Angela Merkel Suriya əhalisinə humanitar yardım etməyi öhdəsinə götürüb
Almaniya hökuməti Suriya əhalisinə humanitar yardım üçün 2,3 milyard avro ayıracaq.
1news.az-ın AZƏRTAC-a istinadən verdiyi xəbərə görə, bunu kansler Angela Merkel Londonda keçirilən Suriya üzrə donor konfransından əvvəl deyib. Onun sözlərinə görə, 1,1 milyard avro 2016-cı ildə ayrılacaq, yerdə qalan məbləğ isə 2018-ci ilədək ödəniləcək. Vəsait Yaxın Şərq regionunda suriyalı qaçqınların ərzaq məhsulları ilə təmini, habelə təhsil və işə düzəltmə sahəsində proqramlar üçün nəzərdə tutulacaq.
epd informasiya agentliyi Angela Merkelin sözlərini sitat gətirir: “AFR hökuməti əmindir ki, qaçqınları ölkəni tərk etməyə məcbur edən səbəblərin qarşısını yerindəcə almaq lazımdır”. Konfransdan əvvəl Böyük Britaniya hökuməti 1,6 milyard avro, Norveç isə 2020-ci ilədək təxminən 1 milyard avro ayıracağını vəd edib.
Suriya üzrə donor konfransı BMT, habelə Böyük Britaniya, Almaniya, Norveç və Küveytin hökumət orqanları tərəfindən təşkil edilib. Konfransda 70 dövlətin nümayəndələrinin iştirakı gözlənilir.
1news.az
