BP-nin vitse-prezidenti BANM-də təqdimatla çıxış edib
BP şirkətinin Əməyin Təhlükəsizliyi və Əməliyyat Riskləri Departamenti üzrə vitse-prezidenti Robert Vot Bakı Ali Neft Məktəbinin tələbələri qarşısında ”Təhlükəsizlik və əməliyyat riskləri” mövzusunda təqdimatla çıxış edib.
1news.az-ın məlumatına görə, BANM-nin rektoru Elmar Qasımov beynəlxalq neft-qaz şirkətləri ilə qurulmuş əlaqələrdən söz açaraq Ali Məktəbin BP şirkəti ilə əməkdaşlığından danışıb.
Qeyd olunub ki, BANM-nin tələbələri BP-də mütəmadi olaraq təcrübə keçirlər. Rektor müxtəlif beynəlxalq şirkətlərin, o cümlədən BP-nin mütəxəssislərinin BANM-də keçirdiyi təqdimatların tələbələr üçün faydalı olacağına əminliyini ifadə edib.
BP şirkətinin vitse-prezidenti R.Vot təqdimatında neft və qaz sənayesi tarixində baş vermiş böyük qəzalar barədə məlumat verib, bu qəzaların səbəbləri və BP-nin yerinə yetirdiyi təhlükəsizlik tədbirləri haqqında danışıb.
O, belə xətaların baş verməməsi üçün mühəndislərin üzərinə düşən vəzifə və öhdəliklərin yerinə yetirilməsinin vacibliyini vurğulayıb.
Sonda R.Vot tələbələri maraqlandıran sualları cavablandırıb.
1news.az
