Dövlət Statistika Komitəsi: Kənd təsərrüfatı məhsullarının istehsalçı qiymətləri bahalaşıb
Kənd təsərrüfatı məhsullarının istehsalçı qiymətləri əvvəlki ayla müqayisədə 1,3% bahalaşıb. Belə ki, yanvar ayında bitkiçilik məhsullarının istehsalçı qiymətləri 1,5%, heyvandarlıq məhsullarının istehsalçı qiymətləri isə 1,2% bahalaşıb.
Bu barədə Dövlət Statistika Komitəsindən (DSK) 1news.az-a bildirilib.
“Ümumilikdə kənd təsərrüfatı məhsullarının istehsalçı qiymətləri əvvəlki ayla müqayisədə 1,3% bahalaşıb. Ay ərzində bitkiçilik məhsullarından buğdanın, noxud və lobya dəninin, fındığın, qozun, xiyarın, pomidorun, kələmin, soğanın, yerkökünün, çuğundurun, heyvanın, narın, xurmanın, almanın istehsalçı qiymətləri bahalaşıb”, – deyə komitədən qeyd edilib.
DSK-dan həmçinin bildirilib ki, digər bitkiçilik məhsullarının qiymətlərində ciddi dəyişikliklər baş verməyib:
“Heyvandarlıq məhsullarından südün istehsalçı qiyməti ucuzlaşıb, yumurtanın, ev quşlarının, mal və qoyun ətinin istehsalçı qiymətləri bahalaşıb, digərlərinin isə qiymətlərində ciddi dəyişikliklər baş verməyib”.
1news.az
