Əbülfəs Qarayev: "Azərbaycan Türkiyə və Rusiyada öz turizm nümayəndəliyini açacaq"

“Turizm şirkətləri və respublikanın regionlarındakı mehmanxanaları öz hesablamalarını manat hesabı ilə aparırlar. Bunun nəticəsidir ki, Rusiyanın, İranın, hətta Gürcüstanın turizm şirkətləri Azərbaycana turist göndərməyə maraq göstərirlər”. 

1news.az-ın verdiyi xəbərə görə, bunu jurnalistlərə açıqlamasında mədəniyyət və turizm naziri Əbülfəs Qarayev deyib.

Nazirin sözlərinə görə, bu yaxınlarda bu ölkələrin turizm assosiasiyaları ilə müqavilə bağlanıb:

“Manatın düşməsi ilə əlaqədar xarici ölkələrdən, xüsusilə qonşu ölkələrdən Azərbaycana gələn turistlərin sayının artmasını gözləyirik. Elə şirkətlər var ki, Azərbaycandan xaricə turist göndərdikdə onlar şirkətlərə ödəmələri dollar, avro və yaxud digər valyuta tətbiq edirlər. Çünki, onların müqavilələri xarici ölkələrlə bağlıdır”.

Nazir qeyd edib ki, Azərbaycanın daxilində isə bütün ödəmələr milli valyuta ilə həyata keçirilir:

“Bu da indiki dövrdə ölkəmizə turizm axını imkan verir. Bunun üçün nazirlik tərəfdən artıq lazımi işlər aparılır. Bu yaxınlarda Rusiya və Türkiyə Mədəniyyət və Turizm Nazirliyinin və Azərbaycan Turizm Assosiasiyaları nümayəndəliyi açılacaq. Artıq müqavilələr bağlanıb, yerlər və məkanlar müəyyənləşdirilib.

Bu ayın axırına kimi Türkiyədə, gələn ayın ortasına kimi Rusiyada Azərbaycan turizminin xüsusi nümayəndəlikləri açılacaq. Hesab edirik ki, bu gün Azərbaycan turizm sənayesində tətbiq olunan qiymətlər tamamilə bu regionda verilən təkliflərlə rəqabət apara bilər. Bu da ümumi strateji xəttimizdir”.

1news.az