Qiymətli kağızlar bazarının vahid ticarət, ticarət sonrası və nəzarət sistemi istifadəyə verilib

Fevralın 17-də Qiymətli Kağızlar üzrə Dövlət Komitəsində (QKDK) Azərbaycan qiymətli kağızlar bazarının vahid ticarət, ticarətsonrası və nəzarət sisteminin açılışı olub.

1news.az-ın AZƏRTAC-a istinadən verdiyi xəbərə görə, QKDK-ın aparat rəhbəri Bəxtiyar Əzizov “Kapital bazarlarının müasirləşdirilməsi” layihəsi barədə ətraflı məlumat verib. Bildirilib ki, layihə Beynəlxalq Yenidənqurma və İnkişaf Bankı tərəfindən maliyyələşdirilir.

Layihənin məqsədi kapital bazarlarında səmərəli tənzimləyici çərçivə və infrastrukturun təmin edilməsi, maliyyələşmə və investisiya mexanizmləri kimi səhm və korporativ borc alətlərinin istifadəsinin genişləndirilməsi vasitəsi ilə iqtisadi artım və yüksək rifahı dəstəkləməkdən ibarətdir.

Hər iki ölkə arasında əməkdaşlıq potensialının çox böyük olduğunu deyən Koreya Respublikasının ölkəmizdəki səfiri Kim Çanq-gyu qiymətli kağızlar bazarının vahid ticarət, ticarətsonrası və nəzarət sisteminin istifadəyə verilməsinin Azərbaycanın texnologiya bazarına mühüm töhfə verəcəyini diqqətə çatdırıb.

1news.az