İsveçdə Xocalı soyqırımına həsr olunmuş “Sonsuz dəhliz” filminin premyerası keçirilib
İsveçin paytaxtı Stokholmda Xocalı soyqırımına həsr olunmuş “Sonsuz dəhliz” filminin premyerası keçirilib.
1news.az-ın məlumatına görə, “Zita” tetrında baş tutan premyerada tanınmış siyasətçilər, jurnalistlər və ictimaiyyət nümayəndələri iştirak ediblər.
BAFTA Kino Akademiyasının mükafatçısı britaniyalı aktyor Ceremi Ayrons tərəfindən səsləndirilmiş filmin prodüseri və rejissoru litvalı Aleksandras Brokasdır.
“Xocalıya Ədalət!” kampaniyası çərçivəsində keçirilən tədbirdə iştirakçılara keçən əsrin ən böyük faciələrindən olan Xocalı soyqırımı haqqında geniş məlumat verilib.
A.Brokas bildirib ki, o, regionda olan vəziyyətlə bağlı müstəqil baxış yaratmaq üçün bu layihə üzərində 15 ölkədən olan mütəxəssislərlə birgə işləyib:
“Azadlıq və müstəqilliyə doğru gedən yol bütün post-sovet ölkələrində çox oxşardır: bu mübarizə çox baha başa gəldi. Xocalı faciəsində riyakar və qəddar insanların digərlərinin taleyini necə həll etməsi hekayəsindən bəhs edilir”.
Avropa Azərbaycan Cəmiyyətinin (TEAS) direktoru Lionel Zetter qeyd edib ki, beynəlxalq səylərə baxmayaraq bu günədək Dağlıq Qarabağ münaqişəsinin həlli hələ də tapılmayıb: “Mən ümid edirəm ki, bu film unudulmuş regiona diqqəti yenidən cəlb edəcək”.
Qeyd edək ki, film Dağlıq Qarabağ münaqişəsini və Xocalı qırğınını hərbi müxbir kimi işıqlandırandan 20 il sonra Azərbaycana qayıdan litvalı jurnalist Riçard Lapaitisin hekayəsi əsasında qurulub.
Sənədli filmdə onun bu faciədən sonra sağ qalanlarla yenidən görüşməsi kadrları göstərilir. Onlar təhlükəsiz dəhliz axtarışına çıxaraq “Sonsuz dəhliz” boyu erməni bombardmanından qaçdıqları, bu yolda itirdikləri əzizlərini xatırlayaraq öz ürək dağlayan hekayələrini nəql edirlər.
Filmdə, həmçinin, qırğını törədənlər, erməni komandirlərinin fikirləri, onların müharibə strategiyası və səbəbləri barəsində də bəhs edilir. Birləşmiş Millətlər Təşkilatının bir neçə qətnamə qəbul etməsinə və digər beynəlxalq qurumların Dağlıq Qarabağdakı Ermənistan silahlı qüvvələrinin qeyd-şərtsiz çıxarılmasına dair çağırışlarına baxmayaraq, bu günə qədər Dağlıq Qarabağ və Azərbaycanın yeddi ətraf rayonu işğal altında qalmaqda davam edir.
Tədbirdə, həmçinin, “Müharibə çinayətinin Xocalı şahidi. Ermənistan müttəhim kürsüsündə” adlı kitabın da təqdimatı keçirilib. Kitabın redaktoru İan Peart bildirib ki, bu kitab iki məqsəd daşıyır: qurbanlar barədə həqiqətləri dünya ictimaiyyətinə çatdırmaq və beynəlxalq baxımdan obyektiv faktları təmin etməkdir:
“Bu kitabı oxuyandan sonra, ümid edirəm ki, oxucular özlərinə sual edəcəklər: yardım etmək üçün mən nə edə bilərəm? Biz bu cür cinayətlərin təkrarlanmasına bir daha yol verməməliyik”.
Onu da bildirək ki, film, hazırda beynəlxalq yayım şirkətləri tərəfindən nümayiş etdirilir.
1news.az
