Maroş Şevçoviç: “Türkiyə “Cənub Qaz Dəhlizi” layihəsi üzrə etibarlı tərəfdaşdır” - FOTO

Avropa Komissiyasının enerji ittifaqı üzrə vitse-prezidenti Maroş Şevçoviç Bakıda Türkiyənin enerji və təbii sərvətlər naziri Berat Albayrakla görüşüb.

“Bakıda Türkiyənin enerji və təbii sərvətlər naziri Berat Albayrakla görüşməkdən çox şadam. Bu, “Cənub Qaz Dəhlizi” layihəsi üzrə vacib və etibarlı tərəfdaşdır”, - bu haqda Şevçoviç öz Twitter səhifəsində qeyd edib.

Qeyd edək ki, Bu gün Bakıda “Cənub Qaz Dəhlizi” layihəsinin Məşvərət Şurasının II iclası keçirilir. Azərbaycan Prezidenti İlham Əliyevin də qatıldığı toplantıda layihənin iştirakçısı olan ölkələrin – Azərbaycan, Türkiyə, Gürcüstan, Yunanıstan, Albaniya, İtaliya, Bolqarıstan, Xorvatiya, Serbiya, Monteneqronun enerji nazirlərinin rəhbərlik etdiyi nümayəndə heyətlərinin, ABŞ, Avropa İttifaqı və Böyük Britaniyanın yüksək vəzifəli şəxslərinin, habelə Transanadolu Boru Kəməri (TANAP) və Transadriatik Boru Kəməri (TAP) layihələrinin və beynəlxalq maliyyə təşkilatlarının rəhbərlərinin iştirakı nəzərdə tutulub.

Tədbirə həmçinin ABŞ Dövlət Departamentinin beynəlxalq enerji məsələləri üzrə xüsusi nümayəndəsi və əlaqələndiricisi Amos Hokstayn, Avropa İttifaqının (Aİ) xarici əlaqələr və təhlükəsizlik siyasəti üzrə ali nümayəndəsi Federika Mogerini, həmçinin Avropa Komissiyasının enerji birliyi üzrə vitse-prezidenti Maroş Şevçoviç də iclasa qatılıb.

İclas üç plenar sessiya və dəyirmi masadan ibarət olacaq.

Tədbirin yekununda “Cənub Qaz Dəhlizi” Məşvərət Şurası çərçivəsində nazirlərin görüşünün iştirakçıları tərəfindən Birgə Bəyannamə imzalanacaq.

Daha əvvəl Şevçoviç öz Twitter səhifəsində qeyd etmişdi ki, “Cənub Qaz Dəhlizi” layihəsi Avropanın enerji təhlükəsizliyinin təminatında aparıcı rol oynayır:

“Mən, ötən il ərzində bu cür strateji infrastruktur layihələrində əldə olunan tərəqqini alqışlayıram”. 

1news.az