Federika Mogerini: "Dağlıq Qarabağ münaqışəsinin sülh yolu ilə həlli Avropa İttifaqı üçün əsas prioritetdir"

Avropa İttifaqı hesab edir ki, Dağlıq- Qarabağ münaqışəsində status-kvo qəbulolunmazdır, münaqışənin sülh yolu ilə həlli Aİ üçün başlıca prioritetdir.

1news.az xəbər verir ki, bu sözləri Avropa İttifaqının xarici əlaqələr və təhlükəsizlik siyasəti üzrə ali nümayəndəsi Federika Mogerini Azərbaycan xarici işlər naziri Elmar Məmmədyarovla görüşdən sonra keçirilən mətbuat konfransında deyib.

 O, “status-kvo”nun qəbuledilməz olduğunu deyib: “Biz Dağlıq Qarabağın müstəqilliyini tanımırıq. Bu münaqişənin həlli bizim üçün prioritet olaraq qalır. Biz həmsədrlərə dəstək olmağa hazırıq. Aİ sülh danışıqlarının aparılmasına tərəfdardır və münaqişənin hərbi yolla həllini görmürük. Çalışmalıyıq ki, hər iki tərəfi sülh prosesinə mane olan çıxışlardan, hərəkətlərdən çəkindirək. Aİ sülhə yönəlmiş fəaliyyətlərə dəstək verəcək. Bu sahədə xüsusi elçimiz olan Helbert Salberlə işə təkan verəcəyik. Münaqişə tərəflərinin yaxınlaşması üçün əlimizdən gələni edəcəyik”

Azərbaycan xarici işlər naziri Elmar Məmmədyarov öz növbəsində bildirib:"İnanmırıq ki, bu münaqişə “dondurulmuş” münaqişədir. Avropa İttifaqı da Minsk qrupu ilə birlikdə təkan verməlidir ki, münaqişəni yerindən tərpədək”.

 Nazir görüşdə saziş layihəsi ilə bağlı işin başlanğıcı üçün atılacaq addımlar barədə danışılıb: “Tərəflər arasında energetika sahəsində əməkdaşlıq genişləndirilir. 2019-cu ildə Azərbaycandan təbii qaz Avropa bazarına çıxarılacaq. Dağlıq Qarabağ münaqişəsi ilə bağlı Azərbaycanın və beynəlxalq təşkilatların qətnamələri barədə məlumat vermişik. Azərbaycan istəyir ki, bu münaqişə tezliklə həll olunsun".

1news.az