Nardaranda hərəkət məhdudlaşdırılacaq
Sabah Nardaran qəsəbəsində yeni su-kanalizasiya xətlərinin çəkilişi ilə bağlı hərəkət məhdudlaşdırılacaq
1news.az-ın verdiyi xəbərə görə, bu barədə “Azəryolservis” ASC-nin mətbuat xidmətindən məlumat veriblər.
Məlumata görə, Sabunçu rayonu Nardaran qəsəbəsində aparılan abadlıq-quruculuq işləri çərçivəsində yeni su-kanalizasiya xətlərinin çəkilişi ilə əlaqədar martın 5-də Abşeron küçəsinin Maştağa-Bilgəh avtomobil yolu ilə kəsişməsində qazıntı işləri aparılacaq. Qazıntı işləri 3 gün müddətində davam edəcək.
Bu müddət ərzində sözügedən ərazidə avtonəqliyyat vasitələrinin hərəkəti qismən məhdudlaşdırılacaq.
Qazıntı işləri bir hərəkət istiqaməti üzrə yekunlaşdırıldıqdan sonra, digər hərəkət istiqaməti üzrə davam etdiriləcək. Bu zaman işlərin aparıldığı ərazidə hərəkət məhdudlaşdırılacaq və əks istiqamət üzrə hər iki tərəfə avtonəqliyyat vasitələrinin hərəkəti təmin olunacaq.
Abşeron küçəsinin Maştağa-Bilgəh avtomobil yolu ilə kəsişməsində sıxlığın yaranmaması üçün sürücülərdən alternativ yollardan istifadə etmələri tövsiyə olunur.
1news.az
