Hüquq müdafiəçiləri Prezident İlham Əliyevə təşəkkür məktubu göndəriblər
Azərbaycan Hüquq-Müdafiə Təşkilatlarının Monitorinq Qrupunun üzvləri martın 17-də əfv sərəncamı imzalamsı ilə bağlı Prezident İlham Əliyevə təşəkkür məktubu göndəriblər.
1news.az-ın məlumatına görə, ilk öncə dövlət başçısını Novruz bayramı münasibətilə təbrik edən hüquq müdafiəçiləri, əfv sərəncamının imzalanmasını onların əməyinə verilən yüksək qiymət kimi dəyərləndiriblər:
“Bu gün biz hüquq müdafiəçilərinə bəxş etdiyiniz ən böyük töhfə, əməyimizə verdiyiniz ən yüksək qiymət imzaladığınız geniş Əfv Sərəncamı və həmin sərəncamla Hüquq-Müdafiə Təşkilatlarının Monitorinq Qrupunun Sizə təqdim etdiyi siyahıdan 14 nəfərin azadlığa qovuşması oldu”.
Müraciətdə Bakı Apellyasiya Məhkəməsi tərəfindən jurnalist Rauf Mirqədirovun azadlığa buraxılması xüsusi qeyd olunub:
“Bu gün faha bir sevinc hissini Bakı Apellyasiya Məhkəməsi tərəfindən jurnalist Rauf Mirqədirovun azadlığa buraxılması ilə yaşadıq. Siz humanizm, insansevərlik hissindən irəli gələn Əfv Sərəncamı ilə hər bir vətəndaşımızın həyat qarantı olduğunuzu sübut etdiniz”- deyə, məktubda vurğulanır.
Hüquq müdafiəçiləri bildiriblər ki, əfv sərəncamının imzalanması bir daha göstərdi ki, Azərbaycan öz problemlərini həll etməyi bacaran ölkədir və onunla güc və təsir dilə danışmaq yolverilməzdir:
“Avropa Şurası tərəfindən İnsan Hüquqları ilə birgə İşçi Qrupunun fəaliyyətinin dayandırılmasına və öz nümayəndəsinin geri çağrılmasına baxmayaraq, İşçi Qrupu Sizin qətiyyətli iradənizlə öz işini davam etdirməklə ölkəmizdə dövlət orqanları ilə vətəndaş cəmiyyətləri arasındakı konstruktiv dialoqa töhfəsini verir. Bu addımınız beynəlxalq aləmə, Qərbin nüfuzlu təşkilatlarına göstərdi ki, Azərbaycan öz problemlərini həll etməyi bacaran ölkədir və onunla güc və təsir dilə danışmaq yolverilməzdir.
Qısa vaxt kəsiyində qrupun səyləri nəticəsində vətəndaşlardan qəbul etdyimiz 80-nə yaxın şikayət həllini tapdı. Biz ümid edirik ki, Birgə İşçi Qrupu çərçivəsində ölkədəki bir çox problemləri davamlı fəaliyyətimizlə həll edə biləcəyik“- deyə, məktubda vurğulanır.
Qeyd edək ki, məktubu Dilarə Əliyeva adına Qadın Hüququları Cəmiyyətinin sədri Novella Cəfəroğlu, İnsan Hüquqları və Qanunçuluğun Müdafiəsi Bürosunn rəhbəri Səidə Qocamanlı, Beynəlxalq İnsan Hüquqları Təşkkilatının Azərbaycan bölməsinin rəhbəri Səadət Bənənyarlı imzalayıblar.
Xatırladaq ki, Prezident İlham Əliyev martın 17-də əfv sərəncamı imzalayıb. Sərəncam 148 nəfərə şamil olunub.
1news.az
