Yüksək dövlət təltiflərinə layiq görülmüş neftçilərə orden və medallar təqdim olunub – FOTO
SOCAR-ın Baş ofisində Prezident İlham Əliyevin bu il 20 sentyabr - Neftçilər günü münasibəti ilə imzaladığı sərəncamlara əsasən təltif edilmiş neftçilərə yüksək dövlət mükafatları təqdim olunub.
1news.az-ın məlumatına görə, əvvəlcə tədbir iştirakçıları dekabrın 4-də təbii fəlakət nəticəsində “Günəşli” yatağındakı 10 və '”Neft Daşları”'ndakı 501 nömrəli dəniz özüllərində baş vermiş qəza zamanı həlak olmuş neftçilərin xatirəsini bir dəqiqəlik sükutla yad ediblər.
Mərasimdə çıxış edən SOCAR-ın prezidenti Rövnəq Abdullayev neftçi əməyini həmişə yüksək qiymətləndirən, Azərbaycan neftçilərinin fəaliyyətini, neft-qaz sənayesinin inkişafını daim diqqət mərkəzində saxlayan ölkə Prezidenti İlham Əliyevə SOCAR-ın coxminli kollektivi adından dərin minnətdarlığını bildirib.
R.Abdullayev vurğulayıb ki, əsası ulu öndər Heydər Əliyev tərəfindən qoyulan enerji strategiyamız möhtərəm prezidentimiz İlham Əliyevin rəhbərliyi altında uğurla davam edir. SOCAR prezidenti cari ildə həyata keçirilən neft və qaz əməliyyatlarının uğurla davam etdiyini bildirib, Azərbaycan neftçilərinin bundan sonra da qarşılarında qoyulan vəzifələrin öhdəsindən layiqincə gələcəklərinə əminliyini ifadə edib.
Sonra Azərbaycan Respublikası Prezidentinin müvafiq sərəncamları ilə “Şöhrət” ordeni, “Tərəqqi” medalı ilə təltif olunmuş, “Əməkdar mühəndis”, “Əməkdar hüquqşünas”, “Əməkdar elm xadimi” fəxri adına layiq görülmüş neftçilərə ali dövlət mükafatları təqdim olunub.
1news.az
