Böyük Britaniyanın Aberdin Universitetində Novruz şənliyi keçirilib
Baharın gəlişi - Novruz bayramı münasibətilə Böyük Britaniyanın Aberdin Universitetində bayram şənliyi keçirilib.
Universitetdə təhsil alan həmyerlimiz Kənan Əliyev AZƏRTAC-a bildirib ki, Aberdin Azərbaycan Cəmiyyəti tərəfindən təşkil olunan tədbirdə yerli və xarici tələbələr, eləcə də müəllimlər iştirak ediblər.
Aberdin-Azərbaycan Cəmiyyətinin sədri Kənan Əliyev çıxış edərək xalqımızın ən qədim bayramlarından olan Novruz, həmçinin Azərbaycanın tarixi, mədəniyyəti və müasir inkişafı barədə iştirakçılara ətraflı məlumat verib.
Bildirilib ki, hər il martın 20-21-i Azərbaycanda yaz fəslinin gəlişi, təbiətin canlanması, yeni ilin başlanğıcı sayılan Novruz bayramı kimi qeyd olunur. Əsrlərin sınağından çıxmış mənəvi dəyərlərimizi, adət-ənənələrimizi özündə yaşadan Novruz insanlar arasında birliyin və mehribanlığın möhkəmləndirilməsi, onların bir-birinə mərhəmət və diqqət göstərməsi kimi sağlam bir təməl üzərində bərqərar olub. Novruz ruh yüksəkliyi, əmək coşqunluğu, torpağa, insana məhəbbət bayramıdır. Bu səbəbdən xalqımız bu bayramı böyük sevinc və sevgi ilə qarşılayır.
Diqqətə çatdırılıb ki, xaricdə yaşayan soydaşlarımız bu bayramı doğma Vətəndə qeyd edə bilməsələr də, milli adət-ənənələrimizi uzaq ölkələrdə də yaşatmağa çalışırlar.
Tədbirdə qonaqlar Cəmiyyətin üzvlərinin ifasında Azərbaycanın milli musiqisi və rəqsləri ilə tanış olublar. Eyni zamanda, iştirakçılara Azərbaycan mətbəxinin ləziz nümunələri, milli adətlərə uyğun olaraq hazırlanmış bayram xonçaları təqdim edilib.
Azərbaycanın milli adətlərini yüksək qiymətləndirən iştirakçılar belə maraqlı tədbirin təşkil olunmasına görə tələbələrimizə dərin təşəkkürlərini bildiriblər.
