Matəm günlərindən sonra Belçikadakı ilk şənlik tədbirlərindən biri Azərbaycan diasporası tərəfindən təşkil olunmuşdur - FOTO
2016-cı il martın 26-da Belçikanın Ham şəhərində Belçika – Azərbaycan Dostluq Cəmiyyəti və yerli bələdiyyə tərəfindən birgə Novruz şənliyi təşkil olunmuşdur. Tədbirdə Azərbaycan Respublikasının Belçikadakı Səfirliyinin nümayəndələri iştirak etmişlər.
Brüsseldə baş vermiş terror aktları ilə əlaqədar elan edilmiş matəm günlərindən sonra Belçikada təşkil edilmiş ilk kütləvi şənlik tebirlerinden biri olan və 200-dən artıq şəhər sakininin iştirak etdiyi tədbir zamanı Belçika – Azərbaycan Dostluq Cəmiyyətinin sədri Ayxan Dəmirçi və Ham şəhərinin meri Dirk De Vis çıxış edərək bu qədim bayramın önəmindən bəhs etmiş, onun Avropa şəhərlərində qeyd edilməsinin Azərbaycanın və bütün türk dünyasının min illər boyu sahib olduğu milli-mədəni irsin qitə səviyyəsində tanınmasına imkan yaratdığını qeyd etmişlər.
Daha sonra çıxış edən Səfirliyin muşaviri Zaur Əhmədov iştirakçıları təbrik etmiş, bu tədbirin Belçikada baş vermiş məlum hadisələrdən sonra, Azərbaycanın belçikalı dostlarına bahar nikbinliyi gətirməyə xidmət etdiyini diqətə çatdırmış, 2009-cu ildən etibarən UNESCO-nun Bəşəriyyətin Qeyri-maddi Mədəni İrs üzrə Reprezentetiv Siyahısına daxil edilmiş Novruzun həmrəylik aşılayaraq bu günki dünyada ciddi ehtiyac duyulan xalqlararası dostluq və anlaşmaya töhfə verdiyini vurğulamışdır.
Bunun ardınca Novruz haqqında film nümayiş etdirilmiş və bayram adət-anənələri haqqında iştirakçılara məlumat verilmişdir.
Tədbirin sonunda Azərbaycan musiqi nümunələri ifa olunmuş və bayram süfrəsi açılmışdır.
Tədbir yerli mətbuatda işıqlandırılmışdır.
