Naxçıvanlı şagirdlər muxtar respublikaya yola salınıblar - FOTO
Prezident İlham Əliyevin tapşırığına əsasən “Ölkəmizi tanıyaq” devizi ilə təşkil edilmiş növbəti maarifləndirici tur-aksiya martın 27-də başa çatıb.
AZƏRTAC xəbər verir ki, tur-aksiya çərçivəsində muxtar respublikadan IX-XI siniflərdə təhsil alan 150 şagird, 20 bələdçi-müəllim Bakıya olub. Tur-aksiyanın məqsədi ölkəmizin tarixi, mədəniyyəti və adət-ənənələrinin şagirdlərə əyani şəkildə çatdırılmasıdır.
Məktəbli Əkbərova Ulduz deyib: “Tur-aksiya biz şagirdlər üçün fürsətdir. Bu layihə sayəsində biz Bakını daha yaxından tanıyacağıq. Layihə vasitəsilə şəhərin tarixi yerlərini, mədəniyyət ocaqlarını görəcəyik. Bunları nəzərə alaraq maarifləndirici tur-aksiyanın təşkilatçılarına təşəkkür edirəm”.
Naxçıvanlı şagird Əkbərova Sürəyya qeyd edib ki, gənclər bu səfərlər zamanı geriyə yeni və zəngin biliklərlə qayıdırlar. Bu mənada tur-aksiya çərçivəsində nəzərdə tutulan tədbirlər gənclər üçün faydalı olacaq.
Şagird Arif Yusifov tur-aksiyada iştirak etdiklərinə görə çox sevindiklərini söyləyib, Bakıya səfərdən zəngin təəssüratlarla və məlumatlarla geri döndüklərini bildirib. Göstərilən diqqət və qayğıya görə dövlətimizin başçısına təşəkkür edib.
Şagirdlər Bakıda Fəxri xiyabanda ulu öndər Heydər Əliyevin məzarını və Şəhidlər xiyabanını ziyarət ediblər, Heydər Əliyev Mərkəzi, Qız qalası, Şirvanşahlar sarayı, Azərbaycan Milli Tarixi Muzeyi, Xalça muzeyi, Beynəlxalq Muğam Mərkəzi, “Atəşgah” məbədi, “Qala” Dövlət Tarix-Etnoqrafiya Qoruğu və digər mədəni-tarixi yerlərlə, eləcə də Bakı Olimpiya Stadionu ilə tanış olublar.
