Nardaran qəsəbəsinin Abşeron küçəsinin yenidən qurulması işləri yekunlaşıb - FOTO
Bakının Nardaran qəsəbəsinin abadlaşdırılması, qəsəbədəki sosial-mədəni infrastrukturun yenilənməsi məqsədilə aparılan kompleks tədbirlər çərçivəsində “Azəravtoyol” ASC tərəfindən Abşeron küçəsinin yenidən qurulması işləri yekunlaşdırılıb.
1news.az-a ASC-nin mətbuat xidmətindən bildirilib ki, küçənin uzunluğu 2,2 kilometr, eni isə 8 metr idi. Layihəyə uyğun olaraq küçə genişləndirilərək 2 gediş, 2 gəliş hərəkət zolağı olmaqla 18 metrə çatdırılıb. Bunun üçün isə küçə boyu yaşayış və qeyri-yaşayış obyektlərinin söküntüsü işləri aparılıb. Sökülən evlərin və obyektlərin sahiblərinə qanunvericiliyə uyğun nəzərdə tutulmuş kompensasiya ödənilib.
Yüksək keyfiyyətlə və texnoloji ardıcıllığa riayət olunmaqla aparılan işlər çərçivəsində genişləndirilmiş küçə boyu yeni hasarlar tikilib, suvanıb və rənglənib, sakinlərin həyətlərinin girişinə estetik baxımından küçəyə gözəllik qatan yeni giriş qapıları qoyulub. Yenidənqurma işləri çərçivəsində yeni yeraltı kommunikasiya xətləri ( qaz, işıq, rabitə, su və kanalizasiya ) çəkilib, köhnələri isə tamamilə təzələnib.
Küçə boyu hər iki istiqamət üzrə 2 metr enində yeni piyada səkiləri tikilib, 4500 paqonmetr yeni səki daşı düzülüb. Səkilərin 8800 kvadratmetr sahəsi asfaltlanıb, işıq dirəkləri üçün xüsusi bünövrə tökülüb, dirəklər quraşdırılıb. Abşeron küçəsinin Nəsrulla Əsgərov küçəsi ilə kəsişməsində 10 metr diametrində yeni dairə inşa edilib. Dairənin içərisinə bəzək daşları düzülüb.
Ümumilikdə isə, küçənin 40 min kvadratmetr sahəsinə üçqat və 25 santimetr qalınlığında olmaqla yeni asfalt-beton örtüyünün döşənməsi işləri aparılıb. Bu işlərə paralel olaraq avtonəqliyyat vasitələrinin hərəkətinin tənzimlənməsi məqsədilə zəruri olan yerlərdə yol nişanları quraşdırılıb, yol cizgi xətlərinin və yol göstərici xətlərinin çəkilişi işləri aparılıb.
1news.az
