Sahib Ələkbərov: “Vergidən yayınma halları əsasən ticarət, tikinti və ictimai iaşə məntəqələrindədir”
Azərbaycanda vergi sahəsində əsas problem vergi mədəniyyətinin və şəffaflığın aşağı səviyədə olmasıdır.
1news.az-ın verdiyi xəbərə görə, bunu vergilər nazirinin müavini Sahib Ələkbərov deyib. Onun sözlərinə görə, müəssisə və idarələrdə aparılan vergi yoxlamalarının təxminən 96 faizində vergidən yayınma halları aşkar edilir. Vergidən yayınma halları isə əsasən ticarət, tikinti və ictimai iaşə məntəqələrində mövcuddur:
“Dünyanın başqa dövlətləri ilə müqayisədə Azəraycanda vergi dərəcələri, vergi yükü xeyli aşağıdır. Buna baxmayaraq bir çox hallarda vergidən yayınma halları mövcuddur.Vergidən yayınma əsasən nəğd ödəniş olan sahələrdədir. Nəğdsiz ödəməyə keçsək bu sahədə problemlər də tədricən aradan qalxar və büdcəyə vergidən daxilolmalar xeyli artar”.
S.Ələkbərov şou-biznes nümayəndələrinin vergidən yayınması məsələsinə dətoxunub:
“Təəssüf ki, şou-biznes nümayəndələri arasında da vergidən yayınma halları yüksəkdir. Elə müğənnilər var ki, həftədə bir neçə dəfə, gündə toya gedirlər, lakin büdcəyə cəmi 40-50 manat vergi ödəyirlər, ya da heç ödəmək istəmirlər. Onlara nisbətən çox az maaş alan adi süpürgəçi isə qəpiyinə kimi vergisini ödəyir.
Lakin sevindirici haldır ki, bu sahədə də müsbət dəyişiklik var. Keçən ilin dekabr ayında şou-biznes nümayəndələrindən əvvəlki 11 aydakı qədər vergi ödəməsi daxil olub”.
1news.az
