TANAP-ın 1350 kilometrlik hissəsində borular tikinti yerinə çatdırılıb
Trans-Anadolu qaz boru kəmərinin (TANAP) 1350 kilometrlik hissəsində borular tikinti yerinə çatdırılıb və qaynaq işlərinə başlanılıb.
AZƏRTAC xəbər verir ki, bunu Prezidenti İlham Əliyevin sədrliyi ilə Nazirlər Kabinetinin ilin birinci rübünün yekunlarına və qarşıda duran vəzifələrə həsr olunan iclasında energetika naziri Natiq Əliyev çıxış edərkən deyib.
N.Əliyev bildirib ki, TANAP layihəsi üzrə 2015-ci ilin martından başlanmış tikinti işləri fasiləsiz şəkildə davam etdirilir. Ötən ilin martından başlanmış inşaat işləri ilə əlaqədar qaz kəmərinin 1350 kilometrlik hissəsində borular tikinti yerinə çatdırılıb və qaynaq işləri başlayıb.
Nazir qeyd edib ki, indiyədək TANAP-ın tikintisi üzrə ümumi işlərin 20 faizdən çoxu yekunlaşdırılıb. Hazırda 3 lot halında inşa edilən layihə üzrə tədbirlər qrafikə uyğun şəkildə tam sürətlə davam etdirilir. 2016-cı ildə 1000 kilometr məsafədə qaynaq işlərinin tamamlanması, beləliklə, qaynaqlama prosesinin 70 faizinin yekunlaşdırılması nəzərdə tutulur.
