Tatar icması: Biz, ermənilərin Azərbaycanın işğal edilmiş ərazilərindən çıxarılması barədə bəşəriyyətin bütün mütərəqqi tələblərinə qoşuluruq
“Azərbaycanda yaşayan tatarlar ermənilərin növbəti provokasiyasının qarşısını almaq və mülki əhalinin təhlükəsizliyini təmin etmək məqsədilə Azərbaycan Silahlı Qüvvələrinin həyata keçirdiyi əks-hücumu dəstəkləyirlər. Bir neçə yaşayış məntəqəsini və strateji əhəmiyyətli yüksəklikləri azad etmiş müzəffər Silahlı Qüvvələrimizin uğurları ilə fəxr edirik”.
1news.az-ın verdiyi xəbərə görə, bu sözlər “Tuqan tel” Respublika Tatar Mədəniyyəti Cəmiyyətinin yaydığı bəyanatda qeyd olunur.
Bəyanatı diqqətinizə çatdırırıq:
“İyirmi beş ilə yaxın müddətdə Azərbaycan torpaqlarının beşdə bir hissəsini işğal altında saxlayan Ermənistan öz təcavüzkar siyasətini yenidən nümayiş etdirib. Biz ölkəmizin bir milyon vətəndaşını öz doğma yurdunu tərk etmək məcburiyyəti qarşısında qoymuş Ermənistanın cinayətkar siyasətini qətiyyətlə pisləyirik.
Biz, Ermənistanın və Dağlıq Qarabağda yaradılmış, heç bir dövlət tərəfindən tanınmamış separatçı rejimin regionda və bütün dünyada sülhə və sabitliyə təhlükə yaradan təcavüzünə son qoymağa çağırırıq. Qarabağ uğrunda müharibə Azərbaycanın öz torpağı uğrunda apardığı müharibədir.
Azərbaycan üçün bu mürəkkəb sınaq günlərində biz onu dəstəklədiyimizi, onunla həmrəy olduğumuzu bildirir, qoşunların təmas xəttində döyüş əməliyyatlarında həlak olmuş şəhidlərin ailələrinə və yaxınlarına dərin hüznlə başsağlığı veririk.
Azərbaycanda yaşayan tatarlar doğma yurdumuzun mənafelərini qorumağı və Vətənimizin düşməndən azad olunmasında iştirak etməyi özlərinə borc bilirlər. Biz ötən əsrin 90-cı illərində də erməni işğalçılarına qarşı mübarizədə azərbaycanlı qardaşlarımızla çiyin-çiyinə respublikanın ərazi bütövlüyünü qorumuşuq.
Biz, BMT Təhlükəsizlik Şurası tərəfindən 1993-cü ildə qəbul edilmiş 822, 853, 874 və 884 nömrəli qətnamələrin tələblərinə uyğun olaraq erməni qoşunlarının Azərbaycanın işğal edilmiş ərazilərindən çıxarılması barədə bütün bəşəriyyətin mütərəqqi tələblərinə qoşuluruq. Azərbaycanın ərazi bütövlüyü qeyd-şərtsiz bərpa olunmalıdır. Respublikanın bütün çoxmillətli əhalisi kimi, biz də Azərbaycan Ordusunu və Prezidentimiz, Ali Baş Komandan cənab İlham Əliyevin uzaqgörən siyasətini tamamilə dəstəkləyirik. Əminik ki, işğalçı erməni silahlı dəstələri tezliklə bizim ərazimizdən qovulacaq və Dağlıq Qarabağ müstəqil Azərbaycanın tərkibinə qaytarılacaq!”
1news.az
