Məktəblilər arasında fizika fənni üzrə olimpiada keçirilib

Azərbaycan Milli Elmlər Akademiyasının Fizika İnstitutunun və bu elm müəssisəsinin Gənc Alim və Mütəxəssislər Şurasının təşkilatçılığı ilə fizika, riyaziyyat və informatika təmayüllü liseydə fizika fənnindən olimpiada keçirilib.

İnstitutdan AZƏRTAC-a bildiriblər ki, olimpiada Yasamal rayonu üzrə bütün ümumtəhsil məktəblərinin X sinifləri arasında təşkil olunub.

Məktəblilərdə elmə maraq yaratmaq məqsədilə keçirilən olimpiadanin sualları institutun pedaqoji təcrübəsi olan alimləri tərəfindən hazırlanıb.

Olimpiadanın qaliblərinə diplom və mükafatlar, seçilmiş iştirakçılara isə həvəsləndirici diplomlar veriləcək.