Bakıda 8 yaşlı uşağı girov götürən keçmiş İŞİD üzvü həbs olundu-YENİLƏNİB

Məhkəmənin qərarı ilə 8 yaşlı Hüseyn Ramazanlını girov götürən və onu öldürməklə təhdid edən  Abşeron rayon sakini Elnur Məmmədov həbs olunub.

1news.az-a Sabunçu rayonu Polis İdarəsindən verilən məlumata görə, fakt üzrə Cinayət Məcəlləsinin 144.3 maddəsi  (Adam oğurluğu: yetkinlik yaşına çatmayan şəxs barəsində törədildikdə) üzrə əməliyyat aparılır.

Xatırladaq ki, 144.3 maddəsi 10 ildən 15 ilədək azadlıqdan məhrumetmə cəzasını nəzərdə tutur.

1news.az

11.05.2016 13:51

Bakıda azyaşlı uşağı girov götürərək azad etməsi müqabilində valideynlərindən pul tələb edən şəxs saxlanılıb.

1news.az xəbər verir ki, bu barədə Daxili İşlər Nazirliyindən məlumat veriblər.

Məlumata görə, mayın 10-da Sabunçu rayonu ərazisində yerləşən Şuşa şəhərciyində yaşayan Elnur Ramazanlı 12-ci Polis Bölməsinə müraciət edərək mayın 9-da 8 yaşlı oğlu Hüseynin evdən çıxaraq geri qayıtmadığını bildirib.

Aparılmış araşdırmalarla özünü “İŞİD” üzvü kimi təqdim etmiş şəxsin E.Ramazanlının mobil telefonuna dəfələrlə zəng edib oğlu Hüseyni girov götürməsi, azad edilməsi müqabilində 30000 manat pul istəməsi və polisə bu barədə məlumat veriləcəyi təqdirdə onun orqanlarını çıxarıb satacağını deməsi müəyyən edilib. 

Bakı şəhər Baş Polis İdarəsinin Cinayət Axtarışı İdarəsi və Sabunçu Rayon Polis İdarəsi 12-ci Polis Bölməsi əməkdaşlarının həyata keçirdikləri əməliyyat-axtarış tədbirləri nəticəsində hadisəni törətmiş Abşeron rayon sakini Elnur Məmmədov tutulub, şəhərciyin ərazisində yerləşən 2 mərtəbəli tikintisi başa çatmamış tikilidə əlləri, ayaqları və gözləri yapışqanlı lentlə bağlı vəziyyətdə olan Hüseyn tapılaraq valideynlərinə təhvil verilib. 

Faktla əlaqədar cinayət işi başlanıb, araşdırma aparılır.

1news.az