“Quş qripi” ilə əlaqədar yaz monitorinqləri başa çatıb
Kənd Təsərrüfatı Nazirliyi yanında Dövlət Baytarlıq Nəzarəti Xidmətinin (DBNX), Səhiyyə, Ekologiya və Təbii Sərvətlər nazirliklərinin mütəxəssis və əməkdaşlarının iştirakı ilə mayın 2-dən 13-dək ölkə ərazisində “quş qripi” xəstəliyinə görə növbəti monitorinq aparılıb.
1news.az-a DBNX-nin mətbuat katibi Yolçu Həsənov bildirib ki, bu nəzarət tədbiri köçəri quşların müvəqqəti məskunlaşdığı Abşeron yarımadası, Şabran, Salyan, Lənkəran və Ağcabədi rayonlarındakı milli park və qoruqlarda həyata keçirilib. Eləcə də quşçuluq və şəxsi təsərrüfatlarda saxlanılan quşlardan nümunələr götürülüb.
Monitorinq zamanı seçmə üsulla ovlanan 21 çöl quşunun patoloji materialı, habelə ayrı-ayrı quşçuluq və həyətyanı təsərrüfatlardan götürülən1932 baş ev quşunun qan nümunələri Respublika Baytarlıq Laboratoriyasında müvafiq müayinələrdən keçirilib, nümunələrin heç birində “quş qripi” xəstəliyinin törədicisi aşkarlanmayıb.
Köçəri quşlara görə monitorinq aparılan ərazilərdə xəstə və xəstəlikdən tələf olan quşlara təsadüf edilməyib, eləcə də ölkənin bütün təsərrüfatlarında saxlanılan quşlar arasında hər hansı kəskin infeksion xəstəliyə və xəstəlikdən kütləvi tələfolma hallarına rast gəlinməyib.
DBNX ölkəmizdə “quş qripi” və digər kəskin yoluxucu xəstəliklərə görə epizootik vəziyyətin sabit olmasını, cari ildə aparılan monitorinqlərin nəticələrini, köçəri, sinantrop və ev quşları arasında bu xəstəliyin hər hansı tipinə təsadüf olunmamasını və quşların miqrasiyasını əsas götürərək növbəti monitorinqin payız fəslində aparılmasını nəzərdə tutur.
Hazırda quş qripi və digər yoluxucu xəstəliklərlə bağlı respublikamızda epizootik vəziyyət sabitdir. Bu sabitliyi qoruyub saxlamaq üçün Kənd Təsərrüfatı Nazirliyi yanında Dövlət Baytarlıq Nəzarəti Xidməti aidiyyəti qurumlarla birgə lazımi tədbirlər həyata keçirir.
1news.az
