Yardımlıda şəhid Nurəddin Mirzəyevin layiq görüldüyü medal atasına təqdim olunub - FOTO
Silahlı Qüvvələrimizin şəhid olmuş əsgəri Nurəddin Etimad oğlu Mirzəyevin ölümündən sonra təltif edildiyi “Hərbi xidmətdə fərqlənməyə görə” III dərəcəli medal ailə üzvlərinə təqdim edilib.
1news.az-ın APA-ya istinadla verdiyi xəbərə görə, bu münasibətlə şəhidin doğulduğu Yardımlı rayonunun Honuba kəndində rayon icra hakimiyyətinin, Müdafiə Nazirliyinin məsul işçiləri, rayonun hüquq-mühafizə orqanlarının, idarə, müəssisə, təşkilat rəhbərlərinin, ağsaqqalların, gənclərin və kənd ictimaiyyəti nümayəndələrinin iştirakı ilə mərasim keçirilib.
Tədbirdə Yardımlı Rayon İcra Hakimiyyəti başçısının səlahiyyətlərini icra edən Azər Xamiyev çıxış edərək son illər ordu quruculuğu istiqamətində həyata keçirilən məqsədyönlü işlərdən söz açıb. O, Azərbaycan ordusunun Cənubi Qafqazda ən güclü orduya çevrildiyini deyərək son aylar cəbhə bölgəsində düşmənin təxribatçı əməllərinin qarşısının layiqincə alındığını diqqətə çatdırıb.
Sonra şəhid N.Mirzəyevin layiq görüldüyü medal onun atasına təqdim olunub.
Şəhidin atası Etimad Mirzəyev oğlunun xatirəsini əziz tutduqlarına, ailəsinə göstərilən qayğıya görə ölkə başçısına, rayon rəhbərliyinə və tədbir iştirakçılarına minnətdarlığını bildirib
Sonda şəhidin məzarı ziyarət olunub, ruhuna dualar oxunub.
Qeyd edək ki, Azərbaycan Ordusunun 1996-cı il təvəllüdlü əsgəri Nürəddin Etimad oğlu Mirzəyev aprelin 2-dən 3-nə keçən gecə cəbhə bölgəsində baş vermiş döyüşlərdə şəhid olub. O, aprelin 4-də doğulduğu Yardımlı rayonunun Honuba kəndində dəfn edilib.
1news.az
