Milli Məslisin nümayəndə heyəti Sankt-Peterburq və Monteneqroya səfər edəcək
Milli Məclisin sədri Oqtay Əsədovun başçılığı ilə parlament nümayəndə heyəti MDB PA-nın növbəti Şura və plenar iclaslarında iştirak etmək üçün mayın 18-dən 20-dək Rusiya Federasiyasının Sankt-Peterburq şəhərində səfərdə olacaq.
1news.az-ın Milli Məclisin mətbuat xidmətinə istinadla verdiyi xəbərə görə, nümayəndə heyətinin tərkibinə Milli Məclis sədrinin müavini Valeh Ələsgərov, deputatlardan İlham Məmmədov, Rauf Əliyev, Mirkazım Kazımov, Fəzail Ağamalı, Rüfət Quliyev, Aparatın rəhbəri Səfa Mirzəyev və digər rəsmi şəxslər daxildirlər.
MDB PA-nın Şura iclasında qurumun xətti ilə təşkilata üzv ölkələrdə keçirilmiş prezident və parlament seçkilərinin monitorinqi, Parlament Assambleyasının ötən ilki fəaliyyəti və digər məsələlər müzakirə olunacaq.
Təşkilatın 44-cü plenar iclasında “Energetikanın inkişafının əsasları haqqında”, “Bioloji müxtəlifliyin qorunması, istifadəsi, yenidən bərpası haqqında”, “Ekoloji ekspertiza haqqında” və digər model qanunlara baxılacaq, kosmik fəzadan dinc məqsədlərlə istifadə olunması barədə fikir mübadiləsi aparılacaq.
Deputatlarımız burada MDB PA-nın daimi komissiyalarının iclaslarında iştirak edəcək, müzakirə olunacaq məsələlərə öz münasibətlərini bildirəcəklər.
Səfər çərçivəsində Milli Məclis sədrinin tədbirdə iştirak edən nümayəndə heyətlərinin rəhbərləri ilə bir sıra görüşləri nəzərdə tutulmuşdur. Bu görüşlərdə MDB PA-nın fəaliyyəti, parlamentlərarası əlaqələrin inkişaf perspektivləri, regional münaqişələrin həlli yolları və tərəfləri maraqlandıran digər məsələlər müzakirə olunacaq.
Mayın 20-də Milli Məclisin sədri Oqtay Əsədovun başçılığı ilə parlament nümayəndə heyəti Monteneqronun Podqoritsa şəhərinə səfər edəcək.
Nümayəndə heyətinin tərkibinə Milli Məclis Aparatının rəhbəri Səfa Mirzəyev və digər rəsmi şəxslər daxildirlər. Nümayəndə heyəti burada Monteneqronun müstəqilliyinin 10 illik yubileyi ilə əlaqədar keçiriləcək tədbirlərə qatılacaq.
Milli Məclisin Sədri Oqtay Əsədovun yubiley tədbirində iştirak edən nümayəndə heyətlərinin başçıları ilə bir sıra görüşləri gözlənilir.
Səfər mayın 22-də başa çatacaq.
1news.az
