Silk Way şirkətinə məxsus təyyarənin qəzasını təhqiq edən komissiya hadisə yerində iş aparır
Azərbaycan Dövlət Mülki Aviasiya Administrasiyasının Azərbaycanın “Silk Way” şirkətinə məxsus təyyarənin Əfqanıstanda qəzaya uğraması səbəblərini təhqiq edən komissiyası hazırda aviaqəzanın baş verdiyi yerdədir.
1news.az-a Dövlət Administrasiyasından məlumat verilib ki, Azərbaycan Dövlət Mülki Aviasiya Administrasiyasının şöbə rəisi Muxtar Kərimovun başçılıq etdiyi komissiya Əfqanıstan mülki aviasiya xidmətinin nümayəndələri ilə birlikdə hadisənin təfsilatını öyrənir.
Komissiya həm də həlak olmuş pilotların cəsədlərinin vətənə çatdırılması məsələsi ilə məşğul olur.
Xatırladaq ki, aviaqəza mayın 18-də yerli vaxtla saat 14:30 radələrində Əfqanıstanın Dvayer aeroportunda baş verib. An-12 təyyarəsi havaya qalxarkən maneə ilə toqquşub və qəzaya uğrayıb.
Təyyarə Əfqanıstanın daxilində yükdaşımaların yerinə yetirilməsi üçün Silk Wayşirkətindən icarəyə götürülüb. Baqrandan (Əfqanıstan) Dvayerə gəlmiş təyyarə əlavə yanacaq doldurmaq üçün Marı şəhərinə (Türkmənistan) getməli idi. Təyyarədə yük olmayıb.
Təyyarədəki 9 nəfər heyət üzvündən 7-si həlak olub.
Mövzu ilə əlaqədar oxuyun:
1news.az
