Dolu və qasırğa Tovuz, Gədəbəy və Daşkəsəndə fəsadlar törədib - YENİLƏNMƏ

Dolu və qasırğa Tovuz, Gədəbəy və Daşkəsəndə fəsadlar törədib.

1news.az-ın Trend-ə istinadla verdiyi xəbərə görə, saat 17 radələrindən başlayaraq güclü külək və yağışla müşahidə edilən hava şəraiti Tovuzun bəzi kəndlərində fəsadlar törədib. Yağışın ardından yağan dolu nəticəsində Kirən, Köhnə Qala, Böyük Qışlaq və bir sıra kəndlərdə təsərrüfat sahələrinə ziyan dəyib. Daha çox kartof sahələri yararsız hala düşüb.

Gədəbəydə də kartof sahələrinə güclü külək və qasırğa nəticəsində xeyli ziyan dəyib. Külək rayonda avtomobil məktəbinin dam örütüyünü uçurub. Elektrik naqillərinə qismən ziyan dəyib.

Daşkəsən rayonunda isə yağışla müşahidə olunan güclü qasırğa olub. Təbii fəlakət nəticəsində rayon mərkəzində olan ağaclardan bir neçəsi aşaraq elektrik naqillərini qırıb. Bir ağac nəqliyyat vasitəsinin üzərinə aşıb və avtomobil yararsız hala düşüb.

Güclü külək elektrik dirəklərinin bir neçəsini aşırıb. Hazırda Daşkəsən şəhərinin yarısı elektrik enerjisiz qalıb. Qasırğa bir neçə yaşayış binasının dam örtüyünü kənara atıb.

Hazırda hər üç rayonda təbii fəlakətin vurduğu ziyan müəyyənləşdirilir.

1news.az

19.15

Daşkəsən şəhərində fırtına olub.

1news.az-ın Report-a istinadla verdiyi xəbərə görə, təxminən yarım saatdır şəhərdə güclü yağış yağır.

Fırtına nəticəsində şəhərin bir sıra yerlərinə ziyan dəyib. Şəhərdə bəzi binaların dam örtüyü dağılıb, elektrik naqilləri sıradan çıxıb, elektrik enerjisinin verilişi dayandırılıb. Hazırda güclü külək davam edir.

Hazırda Gədəbəy rayonunda və Gəncə şəhərində də güclü külək əsir. Gəncənin Yeni Gəncə, Mahrısa, Bağbanlar qəsəbələri və şəhərin digər ərazilərində hava şəraitinə görə enerji verilişi dayandırılıb. Hazırda yağıntının azalmasına baxmayaraq, şimşək çaxır, külək əsir.

Bundan əlavə, Qazaxda da güclü yağış yağıb, ancaq ciddi fəsadlar baş verməyib.

1news.az