“Qarabağ”ın hücumçusu qəzaya düşdü

“Qarabağ”ın hücumçusu Reynaldo Silva qəza törədib.

1news.az-ın APA-ya istinadən verdiyi xəbərə görə, hadisə forvardın vətəni Braziliyada baş verib.

Mövsüm başa çatdığı üçün ölkəsində istirahətdə olan “sambaçı” ötən gün Aqreste ştatında qəzaya düşüb.

Belə ki, o, “Chevrolet Camaro” markalı avtomobili ilə saatda 120 km sürətlə hərəkətdə olarkən motosikletlə toqquşub. Hadisə nəticəsində motosikletin sürücüsünün ayağı qırılıb.

“Qarabağ”ın futbolçusu qəzadan sonra xəsarət alan digər sürücüyə kömək edib. Dərhal xəstəxanaya aparılaraq əməliyyat olunan zərərçəkənin vəziyyətinin normal olduğu bildirilib.

Polisin araşdırması nəticəsində Reynaldonun içkili olmadığı üzə çıxıb.

1news.az