“ADEX-2016” sərgisində iştirak etmək istəyən 38 ölkədən 200-dən çox şirkətin sifarişləri qəbul edilib
Cari ilin 6 ayı ərzində Müdafiə Sənayesi Nazirliyi tərəfindən istehsal olunan məmulatların 80 faizini müdafiə və xüsusi, 20 faizini isə mülki təyinatlı məmulatlar təşkil edib.
1news.az-ın verdiyi xəbərə görə, bunu Müdafiə Sənayesi Nazirliyinin müəssisələrində 2016-cı ilin birinci yarımilinin yekunlarına həsr edilmiş səyyar kollegiya iclasında çıxışı zamanı nazir Yavər Camalov deyib.
Mülki təyinatlı məhsulların istehsalı üzrə proqnoza 110 faiz əməl edildiyini diqqətə çatdıran nazirin sözlərinə görə, 2016-cı ilin istehsal proqramına uyğun olaraq hesabat dövründə nazirliyin müəssisələrində yaradılma üzrə 115 mövzunu və 198 mərhələni əhatə edən elmi-tədqiqat və təcrübi-konstruktor işləri davam etdirilib.
Müdafiə təyinatlı məmulatların yaradılması sahəsində nazirliyin elm müəssisələrinin potensialından istifadə etməklə elmi-tədqiqat və təcrübi-konstruktor işləri uğurla həyata keçirilir. Nazirliyin Elmi-Tədqiqat İnstitutunda (ETİ) cari ildə 15 mövzu, o cümlədən dövlət sifarişi xətti ilə 14 mövzu üzrə elmi-tədqiqat və təcrübi-konstruktor işləri davam etdirilir. Eləcə də, Milli Aerokosmik Agentliyində (MAKA) Silahlı Qüvvələrin sifarışləri əsasında müxtəlif sahələri əhatə edən 33 mövzu üzrə elmi-tədqiqat işləri aparılır.
Kollegiyada qeyd olunub ki, Müdafiə Sənayesi Nazirliyinin müəssisələrində yaradılan və istehsal olunan məmulatlar cari ilin aprel ayında Malayziyanın Kuala-Lumpur şəhərində keçirilən “DSA-2016” XV Asiya müdafiə xidmətləri sərgisində uğurla nümayiş olunub. Bu sərgidə müxtəlif növ atıcı və yaxın məsafəli döyüş vasitələri, artilleriya silahları, zirehli texnikalar, müxtəlif çaplı aviasiya bombaları, pilotsuz uçuş aparatları, atıcı silahlar üçün müxtəlif növ döyüş sursatları, kiçik çaplı avtomatik tapançalar üçün döyüş sursatları, optik cihazlar və s. olmaqla 220 adda müdafiə təyinatlı məmulat nümayiş etdirilib. Nazirliyin nümayiş etdirdiyi məmulatlar böyük maraqla qarşılanıb.
“DSA-2016” sərgisi çərçivəsində tədbirə qatılan bir sıra ölkələrin qabaqcıl şirkətlərini təmsil edən nümayəndə heyətlərinin rəhbərləri ilə görüşlər keçirilib, mövcud və yeni əməkdaşlıqlara dair danışıqlar aparılıb. Sərgi zamanı sentyabrda Bakıda keçiriləcək “ADEX-2016” ikinci beynəlxalq müdafiə sərgisi ilə bağlı məlumatlar verilib və dəvətlər də çatdırılıb.
Hazırda “ADEX-2016” sərgisi ilə bağlı təşkilati işlər davam etdirilir. Artıq sərgidə iştirak etmək istəyən 38 ölkədən 200-dən çox şirkətin sifarişləri qəbul edilib.
1news.az
