ASAN xidmət mərkəzi Qəblədə fəaliyyətə başladı - FOTO
Qəbələ şəhərində “ASAN xidmət” regional mərkəzinin tikintisinə 2014-cü ilin iyun ayında başlanılıb.
1news.az xəbər verir ki, tkintisi 2016-cı ilin iyul ayında başa çatdırılıb.
Bina 4 mərtəbə və texniki zirzəmidən ibarətdir.
Azərbaycan Respublikası Prezidentinin 2012-ci il 13 iyul tarixli 685 nömrəli Fərmanı ilə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi və onun tabeliyində olan “ASAN xidmət” mərkəzləri yaradılmışdır. Qəbələ “ASAN xidmət” mərkəzində 10 dövlət orqanı (Ədliyyə Nazirliyi, Daxili İşlər Nazirliyi, Vergilər Nazirliyi, Əmlak Məsələləri Dövlət Komitəsi, Dövlət Gömrük Komitəsi, Dövlət Miqrasiya Xidməti, Əmək və Əhalinin Sosial Müdafiəsi Nazirliyi, Milli Arxiv İdarəsi, Səfərbərlik və Hərbi Xidmətə Çağırış üzrə Dövlət Xidməti və İqtisadiyyat Nazirliyi) tərəfindən 32 növ xidmət göstərilir.
Eyni zamanda mərkəzdə 112 növ funksional yardımçı xidmətlər (bank xidmətləri, sığorta xidmətləri, hüquqi yardım xidmətləri, tərcümə xidmətləri və s.) təşkil edilib.
Mərkəzdə əməkdaşların sayı 155, könüllülərin sayı 45 nəfərdir.
Mərkəzdə video müşahidə, video növbə sistemi, lift, 6 eskalator, yanğın təhlükəsizliyi sistemi, mərkəzi ventilyasiya sistemi, mərkəzi isitmə və soyutma sistemi, çiller, davamlı elektrik enerjisi ilə təmin edən UPS və generatorlar quraşdırılıb.
Mərkəzin ərazisində park salınıb, fontanlı kaskad şəlalə, uşaqlar üçün oyun meydançası, velosiped yolu, oturacaqlar, LED işıqlandırmalı fonarlar və informasiya tabloları, 120 avtomobillik park yeri, başqa regionlardan gələn vətəndaşlar üçün avtobus dayanacağı tikilib.
Qəbələ “ASAN xidmət” mərkəzi Balakən rayonu (əhalisi 94900 nəfər), Zaqatala rayonu (əhalisi 124700 nəfər), Qax rayonu (əhalisi 55200 nəfər), Şəki rayonu (əhalisi 181000 nəfər), Qəbələ rayonu (əhalisi 102898), Oğuz rayonu (əhalisi 84892), İsmayıllı rayonu (əhalisi 40845), Ağsu rayonu (əhalisi 76300), Şamaxı rayonu (əhalisi 97700), Qobustan rayonu (əhalisi 44000) ərazisində qeydiyyatda olan, ümumilikdə 902435 vətəndaşa xidmət göstərəcək.
Qəbələ “ASAN xidmət” mərkəzi Qəbələ şəhəri, Elçin Kərimov küçəsi 79 ünvanında yerləşir.
1news.az
