Aprel döyüşçüləri ilə görüş keçirilib - FOTO
Müdafiə Nazirliyinin dəstəyi, Yeni Azərbaycan Partiyasının (YAP) təşəbbüsü və maliyyə dəstəyi ilə aprel döyüşlərinin bir qrup iştirakçısının Lənkəran rayonundakı “Palıdlı sahil” istirahət mərkəzində ailə üzvləri ilə birlikdə istirahətləri təşkil olunub.
1news.az Müdafiə Nazirliyinin (MN) saytına istinadən xəbər verir ki, yerli ictimaiyyət nümayəndələri və qarnizonun əsgərləri istirahət mərkəzində aprel döyüşlərinin iştirakçıları ilə görüşüblər.
Tədbirdə Azərbaycanın ərazi bütövlüyü uğrunda şəhid olanların xatirəsi bir dəqiqəlik sükutla yad edilib.
Görüşdə Azərbaycan Ordusunun regionda ən güclü ordu olduğunu və onun maddi-texniki təchizatının möhkəmləndiyini vurğulayan Müdafiə Nazirliyinin nümayəndəsi, polkovnik Abdulla Qurbani yeni döyüş texnikaları - zenit artilleriya qurğuları, təyyarələr, helikopterlər, gəmilər, lazımi silah-sursatlarla təmin olunduğunu diqqətə çatdırıb.
YAP Siyasi Şurasının üzvü, Milli Məclisin əmək və sosial siyasət komitəsinin sədri Hadı Rəcəbli partiyanın təşəbbüsünü yüksək dəyərləndirərək, aprel döyüşlərində şəhid olmuş və yaralanmış hərbi qulluqçuların ailələrinə göstərilən dövlət qayğısından danışıb, bu ənənənin gələcəkdə də davam etdirilməsinin vacibliyini bildirib.
Daha sonra aprel döyüşlərinin qaziləri xatirələrini dilə gətirərək, bundan sonra da Vətənin müdafiəsi, torpaqlarımızın düşmən tapdağından azad edilməsi üçün əllərindən gələni etməyə hazır olduqlarını bildiriblər.
Tədbirdə hərbi-vətənpərvərlik mövzusunda şeirlər və mahnılar ifa olunub.
1news.az
