Azərbaycanın üç universiteti dünyanın ən yaxşı ali təhsil ocaqları sırasında

Quacquarelli Symonds (QS) şirkəti 2016-cı il üçün universitetlərin beynəlxalq reytinqini dərc edib. Bu siyahıda Azərbaycanın üç universitetinin də adı yer alıb.

Bunlar  – Bakı Dövlət Universiteti (BDU), Qafqaz Universiteti və Xəzər Universitetidir.

QS-nin reytinqi dünyada ən nüfuzludur. Bu il burada 80 ölkədən 916 universitetin adı qeyd edilib. İlk 400 universitet fərdi mövqelərinə görə, digərləri isə oxşar göstəriciləri ilə qruplara bölünür. Azərbaycan universitetləri siyahının sonunda 701+ qrupdadır. Lakin bu siyahıya düşməyin özü yüksək göstəricidir.

Xüsusilə qeyd etmək lazımdır ki, Cənubi Qafqazın digər ölkələrinin universitetləri bu siyahıda təqdim edilməyib. 

Reytinqin ilk sıralarını Massaçuset Texnologiya Universiteti, Stendford Universiteti, Harvard, Kembric və Kaliforniya Texnologiya universitetləri yer alıb.

Reytinq hesablanarkən bir sıra göstəricilər: elmi araşdırmalar sahəsində universitetin nüfuzu, tələbələrə nisbətdə müəllim-professor heyəti, elmi məqalələrin dərci, əcnəbi tələbə və müəllimlərin sayı qeyd edilir.

1news.az