Bakıda bahalı avtomobil yeraltı keçidə aşdı, üç nəfər xəsarət aldı – FOTO – YENİLƏNİB

Dünən axşam saatlarında Bakının Neftçilər prospektində baş verən ağır yol-nəqliyyat hadisəsinin təfərrüatları məlum olub.

1news.az-ın məlumatına görə, hadisə dünən gecə saatlarında, Neftçilər prospektində, Abdulla Şaiq adına Azərbaycan Dövlət Kukla Teatrının qarşısında baş verib.

Belə ki, yüksək sürətlə hərəkət edən “Range Rover Vogue” markalı avtomobil adıçəkilən teatrın qarşısındakı piyada keçidinə aşıb.

“Azəravtoyol” ASC-nin mətbuat xidmətinin rəhbəri Anar Nəcəflinin sözlərinə görə, qəza nəticəsində piyada keçidinə azı 8 min manat məbləğində zərər dəyib. Faktla bağlı akt tərtib olunaraq aidiyyatı qurumlara göndərilib.

Öz növbəsində Bakı şəhər Baş Dövlət Yol Polisi İdarəsindən bildiriblər ki, hadisəni törədən 90-RE-006 dövlət nömrə nişanlı “Range Rover Vogue” markalı avtomobilin sürücüsünün kimliyi məlum olub. Belə ki, bu, 29 yaşl paytaxt sakini Hüseyn Əliyevdir. Hadisə zamanı o və yanındakı iki sərnişin də xəsarət alıb.

Hadisəyə səbəb kimi isə avtomobilin yüksək sürətlə hərəkət etməsi və sürücününü idarəetməni itirməsi göstərilib.

10:55

Bakının mərkəzində ağır yol-nəqliyyat hadisəsi baş verib.

Şahidlərin 1news.az-a verdikləri məlumata görə, hadisə dünən gecə saatlarında, Neftçilər prospektində, Abdulla Şaiq adına Azərbaycan Dövlət Kukla Teatrının qarşısında qeydə alınıb.

Belə ki, “Range Rover Vogue” markalı avtomobil yoldan çıxaraq yaxınlıqdakı yeraltı piyada keçidinə düşüb. Hadisəyə səbəb kimi yüksək sürətlə gedən avtomobilin sürücüsünün idarəetməni itirməsi göstərilir.

Hadisə nəticəsində avtomobildə olan bir neçə şəxsin xəsarət alması bildirilir.

1news.az