Azərbaycanda ümumxalq səsverməsi keçirilir – FOTOREPORTAJ

Məlum olduğu kimi, bu gün səhər saat 08.00-da Azərbaycanın bütün ərazisində ümumxalq səsverməsi (referendum) başlayıb.

1news.az-ın məlumatına görə, referendum 125 seçki dairəsi, 5627 seçki məntəqəsi üzrə keçirilir. Seçki məntəqələrindən 5415-i daimi, 212-si müvəqqəti əsaslarla yaradılıb. Ölkə üzrə seçici siyahılarında qeydə alınmış seçicilərin sayı 5 milyon 276 min 111-dir ki, bunların 52 mindən çoxu seçkilərdə (referendumda) ilk dəfə iştirak edir, 454-nün yaşı 100-dən yuxarıdır. Həmçinin 111 seçici məhz səsvermə günü – sentyabrın 26-da səsvermə hüququ qazanıb.

Referendumu izləmək üçün Avropa Şurası Parlament Assambleyası, MDB Parlament Assambleyası, Türkdilli Ölkələrin Parlament Assambleyasının müşahidə missiyaları, Böyük Britaniya, İtaliya, Türkiyə, Fransa, Avstraliya və digər dövlətlərin parlamentariləri, xarici ölkələrin ali seçki qurumlarının nümayəndə heyətləri və s. daxil olmaqla 18 beynəlxalq qurumdan 118 beynəlxalq müşahidəçi akkreditasiyadan keçib ki, bunlar da 33 ölkənin vətəndaşlarıdır.

Müşahidə prosesinə, həmçinin öz təşəbbüsləri ilə və siyasi partiyaların, qeyri-hökumət təşkilatlarının, referendum üzrə təşviqat qruplarının təşəbbüsü ilə akkreditasiyadan keçmiş 53 min 531 yerli müşahidəçi qatılıb.

Səsvermə saat 19.00-da başa çatacaq.

1news.az