Azərbaycanda Dövlət Bayrağı günü qeyd edilir

Bu gün – noyabrın 9-u Azərbaycanda “Dövlət Bayraq Günü” qeyd edilir.

1news.az-ın verdiyi məlumata əsasən, 2009-cu ilin noyabrın 17-i Azərbaycan Respublikasının Prezidenti İlham Əliyev 9 noyabrın Dövlət Bayrağı günü elan edilməsi haqda sərəncam imzalayıb.

Azərbaycan Demokratik Respublikasından bizə varis qalan dövlət bayrağımız 1918-ci ilin noyabrın 9-da qəbul edilmişdi.

Bunu nəzərə alaraq, hər ilin 9 noyabr tarixi Azərbaycanda Dövlət Bayrağı günü kimi qeyd edilir. Azərbaycanın Milli Məclisinin müvafiq qanunlayihəsi ilə 9 noyabr tarixi Azərbaycanda iş günü sayılmır.

Qeyd edək ki, 1918-ci ilin noyabrın 9-da Azərbaycan Demokratik Respublikasının Nazirlər Şurası milli bayraq haqda qərar qəbul edib.

Nazirlər Şurasının sədri Fətəli Xan Xoyski tərəfindən imzalanan bu qərarda deyilir:

“Milli bayraq qismində mavi, qırmızı və yaşıl rənglərdən ibarət və üzərində ağ aypara və ağ səkkizguşəli ulduz təsvir edilmiş bayraq təsdiq edilsin”.

1991-ci ilin fevralın 5-də Azərbaycan Respublikasının Ali Şurası bu bayrağı müstəqilliyini bərpa etmiş ölkəmizin dövlət bayrağı elan edib.

2010-cu ilin sentyabrın 1-də Bakıda təntənəli surətdə Dövlət Bayrağı Meydanının açılışı keçirilib. Dövlət Bayrağı Meydanının yaradılması haqda sərəncam 2007-ci ilin noyabrın 17-də Prezident İlham Əliyev tərəfindən imzalanıb.

Meydanın təməlqoyma mərasimi 2007-ci ilin dekabrın 30-da dövlət başçısının iştirakı ilə baş tutmuşdu.

Qeyd edək ki, sözügedən meydanda həmçinin Dövlət Bayrağı Muzeyi yaradılıb.

1news.az