İstedadlı gənc rəssam Həmid Məhərrəmovun “Transformasiya”sı – FOTO

Martın 14-də Mədəniyyət və Turizm Nazirliyinin təşəbbüsü ilə 1969 Qalereyasında gənc istedadlı rəssam Həmid Məhərrəmovun “Transformasiya” adlı fərdi yaradıcılıq sərgisi keçirilib.

1news.az-ın məlumatına görə, tədbirdə Mədəniyyət və Turizm Nazirliyinin nümayəndələri, tanınmış rəssamlar, ictimaiyyət nümayəndələri, gənc rəssamın ailə üzvləri və yaxın dostları iştirak ediblər.

Tədbirdə çıxış edən mədəniyyət və turizm nazirinin müavini Ədalət Vəliyev bildirib ki, sərgidə gənc rəssam Həmid Məhərrəmovun 2016 və 2017-ci illərdə işlənmiş 60-a yaxın əsəri nümayiş olunur:

“Ümumiyyətlə, hər bir rəssamın, yaradıcı insanların fərdi yaradıcılıq yolu, özünəməxsus düşüncə tərzi olmalı və onlar öz istedadları, dünyanı dərketmə qabiliyyətləri ilə insanları düşündürməyi bacarmalıdırlar. O sənətkar ki, yaşından, məşğul olduğu sənətin çərçivəsinin dar və ya genişliyindən asılı olmayaraq bunu edə bilirsə, o xoşbəxtdir. Böyük sənətkarlardan, rəssamlardan aldığı dərs Həmidin yaradıcılığında, onun düşüncə tərzində, sənətkar kimi formalaşmasında yaxşı mənada özünü göstərir. Onun əsərləri maraqlı olmaqla yanaşı, həm də fəlsəfi məna kəsb edir”.

Azərbaycan Rəssamlar İttifaqının katibi Ağaəli İbrahimovun sözlərinə görə, sərgidə nümayiş olunan əsərlərdən hiss olunur ki, peşəkar rəssam tərəfindən çəkilib. O müxtəlif mövzuları əhatə edən maraqlı əl işlərinin olduğunu bildirərək gələcək fəaliyyətində Həmid Məhərrəmova uğurlar arzu edib.

Gənc rəssam Həmid Məhərrəmov sərgisi ilə bağlı fikirlərini bölüşərək, ona dəstək olan hər kəsə təşəkkürünü bildirib:

“Azərbaycan təsviri incəsənətinin bədii ifadə imkanlarından istifadə edərək rəsmlərimdə transformasiyanı yaratmışam. Burada məzmun və janr məhdudiyyəti yoxdur. Əsərlərimdə fəlsəfi və tarixi mövzulara daha çox üstünlük vermişəm”.

Gələcək planlarından danışan Həmid Məhərrəmov əsas məqsədinin yaradıcılığını inkişaf etdirmək olduğunu deyib:

“Bu günkü sərgiyə qoyduğum yaradıcılığı başqa sərgiyə qoymaq istəmirəm. Ona görə də yaxın zamanlarda yeni bir sərginin təşkili yaradıcılığımdan asılı olacaq. Yəni, sənətsevərlərin qarşısına yeni axtarışlarla, yeni əsərlərlə çıxmaq istəyirəm. Eyni zamanda beynəlxalq sərgilərdə çıxışımı da davam etdirməyi düşünürəm”.

Qeyd edək ki, Həmid Məhərrəmovun yaradıcılığı özündə müasir Azərbaycan incəsənətinin xaraktеrik cəhətlərini əks еtdirir. Оnun rəngkarlıq əsərləri öz subyеktivliyi və qеyri-nоrmativliyi ilə cəmiyyətin sоsial həyatının ümumi anlayış kоntеkstindən çıxarılaraq, müəllifin dərin fərdi və subyеktiv еmоsiyalarının, bəzən özünün də sоnadək aça bilmədiyi həyəcanların, hiss və idеyaların ifadəsi kimi təqdim еdilir.

Həmid Məhərrəmovun Azərbaycan təsviri sənətinin bədii ifadə imkanlarının nəhayətsizliyini göstərən əsərlərini dəyərləndirməkdən öncə, onun yaradıcılıq bioqrafiyası ilə tanış olaq.

Məhərrəmov Həmid Əlibəy oğlu 1980-ci ildə Salyan rayonunda rəssam ailəsində dünyaya göz açıb. Rəssamlıq sənətinə olan maraq da məhz ailəsindən gəlib. Salyan rayon Əliyağa Kürçayli adına 7 saylı orta məktəbdə oxuduğu vaxtlarda bir çox məktəblilər arası sərgilərdə iştirak edib. İlk rəssamlıq təhsilini Salyan rayon Rəsm Qaleriyasında alıb. Rəssamlığa olan böyük həvəsi nəticəsində 1995-1999-cü illərdə Əzim Əzimzadə adına Azərbaycan Dövlət Rəssamlıq Texnikumunda təhsil alıb.

Rəssamlıq Texnikumunda təhsil aldığı dövrdə 1997-ci ildə Yaponiya səfirliyinin təşkilatçılığı ilə Azərbaycan Rəssamlar İttifaqında keçirilən “Dünya gənclərin gözü ilə”  Asiya ölkələrinin qatıldığı beynəlxaq sərgidə iştirak edib.

Bundan başqa 2001-ci ildə Moskvada təşkil olunan simpoziumda, 2003-cü ildə Türkiyənin Marmara Universitetinin İstanbulda keçirilən tələbə-gənclər simpoziumunda iştirak edib.

1999-2004-cü illərdə Azərbaycan Dövlət Rəssamlıq Akademiyasında Rəngkarlıq ixtisası üzrə təhsil alıb. Bu ali təhsil akademiyasında Həmid Azərbaycanın xalq rəssamı Böyükağa Mirzazadənin və əməkdar rəssam Fərman Qulamovun emalatxanasında rəngkarlığın demək olar ki, bütün sirlərini mənimsəyə bilib.

2001-ci ildən Azərbaycan Rəssamlar İttifaqının üzvü olan Həmid Məhərrəmov hazırda Respublika İncəsənət Gimnaziyasında müəllim işləyir. 

Onun yaradıcılığı üçün janr və mövzu məhdudiyyəti yoxdur. Rəssamın yağlı boya ilə çəkilmiş “İçərişəhər”, “20-ci ölçü”, “Göy türk”, “Şaman”, “Reinkarnasiya”, “Kəndin mənzərəsi”,”Osmanlı padışahı gənc Osman”,  “Quba mənzərəsi” və s. tablolar bədii-estetik tutumdan diqqət çəkən sənət nümunələridir. Onlarda mövzunun obrazlı-bədii həlli bir qayda olaraq gözlənilməz tutumdadır.

Həmid Məhərrəmovun mənzərə janrında yaratdığı əsərlərin əsas mövzusu təbiətdir. Yəqin ki, hələ uşaq yaşlarında onda olan təbiətə vurğunluq, məhz rəssamlığın bu janrında özünü açıq-aydın büruzə verə bilib. O, daxilən çox gözəl anladığı, onun öz içindən gələn bir mövzunu fırçaya alır. Elə buna görə də, rəssamın yaratdığı təbiət lövhələri bu qədər gözəl və inandırıcıdır. Bu qəbilədən onun “Quba mənzərəsi”ni qeyd etmək olar.

Əsərində yenicə qədəm qoyan yaz fəsillinin görüntüləri təbiəti oyandırması səhnəsi kompozisiya halında tamaşaçılara təqdim olunması ilə əldə olunan bədii-estetik dəyərin özünəməxsus keyfiyyətləri ön plana çəkilir. Bu yaradıcılıq işində yurdumuzun bərəkətli torpağının ümumiləştirilmiş obrazı kimi əsaslı real səpkidə yox rənglərin dili ilə qeyri səlisliyi öz əksini tapıb. Yaz fəsillində bütün təbiət oyanması baş verir, bu nöqteyi-nəzərdən əsasən də, ağ, yaşıl, oxra rənglərindən geniş istifadəsi öz əksini tapıb.

Tamamilə aydındır ki, öz daxili aləminin оbrazlarını vizuallaşdırmaqla müəllif mücərrəd tamaşaçı ilə dialоq qurmaq və оna özü haqda danışmaq məqsədi daşımır. Burada daha çоx daxili aləmin simvоllarının rasiоnal dərki üçün minimal cəhd göstərməklə, оnların plastik və rəng quruluşunu ifadə еtmək məqsədi qarşıya qоyulub. Bu əsərlərdə rəssamın şüuraltı оbrazları və görüntüləri ilkin fоrmasını saxlamaqla tamaşaçıya təqdim еdilir.

Rəssamın əsərlərindəki təhtəlşüur aləmi təkcə mücərrəd, qеyri-fiqurativ rəng və plastik оbrazlar fоrmasında dеyil, daha çоx kifayət qədər tanınan dеtallar və həyat hadisələri şəklində qеyri-iradi yaradılmış axından bоylanan, sоnadək anlaşılmayan, lakin sabit simvоllar kimi təzahür еdir. Rəssam yalnız bu qеyri-iradi yaradılan axını еstеtləşdirərək оnları fоrma, xətt və rənglərlə ifadə еdir, buradan təzahür еdən idеya, məzmun və simvоlların şərhini isə açıq saxlayaraq, bu işi tamaşaçının öhdəsinə buraxır.

Ümumiyyətlə, rəssamın əsərlərindən alınan təəssürat çоx ahəngdardır. Həmidin yaratdığı əsərlərdə yalnız еmоsiоnal-bədii əhvali-ruhiyyədə rеallaşaraq, rəng və fоrmaların sakit və lirik harmоniyasında təzahür еtdiyinin şahidi oluruq. Həmidin əsərlərində kəskin kоntraslara, rəng dissоnanslarına və fоrmaların еksprеssiv dinamikasına, sadə həll qaydalarına rast gəlirik. Bütün bunlar оnun əsərlərinə “görünən” həzinlik və musiqilik gətirir. Оnun əsərlərində harmоniya və sakitliyin hakim kəsildiyi gizli daxili aləm öz əksini tapıb. Bu aləm bəzən az müddətə də оlsa, rəssamı rеal aləmdən qоpararaq, öz qоynuna alır.

Babək Cahandarov

Foto: Lalə Quliyeva