“Silk Way Airlines”ın hava gəmiləri parkına daha bir “Boeing 747-8F”" yük təyyarəsi əlavə edildi - FOTO

Aprelin 7-sində Heydər Əliyev Beynəlxalq Aeroportunda Azərbaycanın yük aviaşirkəti "Silk Way Airlines"a məxsus yeni "Boeing 747-8F" təyyarəsinin gətirilməsi ilə əlaqədar rəsmi mərasim keçirilib.

1news.az-a şirkətdən verilən xəbərə görə,  tədbirdə "Azərbaycan Hava Yolları" QSC-nin prezidenti Cahangir Əsgərov, "Silk Way Holding"in prezidenti Zaur Axundov, ABŞ-ın Azərbaycandakı fövqəladə və səlahiyyətli səfiri Robert Sekuta, ABŞ-ın Azərbaycandakı səfirliyinin iqtisadi şöbəsinin rəhbəri Karter Uilbur və digərləri iştirak ediblər.

Yeni gətirilən təyyarə "Silk Way Airlines" üçün aviaşirkət tərəfindən istismar olunacaq artıq onuncu "Boeing" tipli və beşinci "Boeing 747-8F" tipli təyyarədir.

Beləliklə, təyyarənin gətirilməsi "Silk Way Airlines" şirkətinin "Boeing" korporasiyası ilə genişmiqyaslı əməkdaşlıq proqramının birinci mərhələsinin uğurla başa çatması deməkdir.

Proqram çərçivəsində alınan hava gəmilərinin ümumi dəyəri təxminən 1 milyard ABŞ dolları təşkil edir ki, bu da Azərbaycanın özəl müəssisələrinin fəaliyyəti və inkişafı tarixində ən böyük layihədir.

Həmçinin qeyd etmək lazımdır ki, 2005-ci ildən etibarən "Silk Way Airlines" aviaşirkəti həm Amerikanın özəl şirkətləri, həm də ABŞ-ın dövlət sektoru ilə işgüzar münasibətləri inkişaf etdirir və möhkəmləndirir.

"Silk Way Airlines" aviaşirkəti ABŞ-ın müvafiq orqanları tərəfindən sertifikatlaşdırılan və tanınan aviadaşıyıcılardan biridir.

US TRANSCOM (ABŞ Silahlı Qüvvələrinin Nəqliyyat Komandanlığı) ilə sıx əməkdaşlıq aviaşirkətə İraq və Əfqanıstan da daxil olmaqla, bütün mühüm istiqamətlər üzrə daşınma sifarişlərini yerinə yetirməyə imkan vermişdir.

Yeni təyyarənin tədarükü "Silk Way Airlines" aviaşirkətinə uçuşların coğrafiyasını genişləndirməyə, daşınan yüklərin həcmini artırmağa və aviadaşımalar bazarının yeni seqmentlərini əhatə etməyə imkan verəcək. Həmçinin bu, aviaşirkətə ümumi hava gəmiləri parkının istismar xərclərini azaltmağa və bunun da nəticəsində bütövlükdə gəlirliliyin artırılmasını təmin etməyə imkan yaradacaq.

Hava gəmiləri parkının genişləndirilməsi ilə "Silk Way Airlines" Azərbaycanın paytaxtından Nyu-York, Çikaqo, Milan, Lüksemburq, Frankfurt, İstanbul, Dubay, Seul, Honkonq və Şanxaya mövcud birbaşa müntəzəm yük reysləri ilə yanaşı, Tokio, Cibuti, Nayrobi və Dakkaya yeni reyslərin açılmasını planlaşdırır.

Son 10 il ərzində Heydər Əliyev Beynəlxalq Aeroportu yük aviadaşımalarının böyük logistik mərkəzinə çevrilib. Bu gün Azərbaycanın mülki aviasiyası özünü Şərq və Qərbi birləşdirən Böyük İpək Yolu layihəsinin rəsmi aviadaşıyıcısı kimi tanıdıb.

Yükdaşıma bazarında özünü çox yaxşı sübut etmiş yeni genişfüzelyajlı uzaq magistrallı "Boeing 747-8F" təyyarələrinin alınması bu strategiyanın həyata keçirilməsinin mühüm bir hissəsidir.

“Silk Way Airlines”lə “Boeing” korporasiyası arasında həyata keçirilən əməkdaşlıq proqramına çox yüksək qiymət verən ABŞ-ın Azərbaycandakı səfiri Robert Sekuta jurnalistlərə müsahibəsində bildirib ki, “Boeing” bu sahədə yaxşı nüfuza malik olan bir şirkətdir: “Hesab edirəm ki, “Boeing”lə AZAL, eyni zamanda ABŞ-la Azərbaycan arasında bu vaxta qədər bu sahədə çox yaxşı və uğurlu əməkdaşlıq var, arzu edirəm və ümid edirəm ki, bu uğurlu əməkdaşlıq bundan sonra da davam edəcək. Vacib məqam ondan ibarətdir ki, ABŞ-la Azərbaycan arasında əlaqələr böyüməkdə və inkişaf etməkdə davam edir”.

Səfir, həmçinin bildirib ki, Azərbaycan son dövrlərdə bir nəqliyyat qovşağı kimi əhəmiyyətini çox artırır, nəqliyyat sahəsində inkişaf günü gündən artır. “Bunu həm yerüstü nəqliyyata - Şimal-Cənub , Qərb-Şərq nəqliyyat dəhlizlərinin inkişafına, həm də hava nəqliyyatına aid etmək olar. Mən çox şadam ki, ABŞ özünün tanınmış keyfiyyətli avadanlıqları ilə Azərbaycanın nəqliyyat qovşağı kimi inkişafında iştirak edir, öz töhfəsini verir və eyni zamanda ABŞ Azərbaycanın hava nəqliyyatından özünü biznes fəaliyyətləri üçün istifadə edir”, - deyən amerikalı səfir bu sahədə çalışan Azərbaycan mütəxəssislərinə də çox böyük qiymət verib. “Çox şadam ki, belə peşəkar və tələbkar mütəxəssislər ABŞ-la əməkdaşlıq edirlər”, - deyib.

1news.az