Dubayda keçirilən sərgidə Ermənistanın təxribatının qarşısı alınıb
24-27 aprel 2017-ci il tarixində Dubayda keçirilən və dünya boyunca ən nüfuzlu turizm sərgilərindən olan “Arabian Travel Market”də Ermənistan tərəfi yenə təxribata əl ataraq Ermənistana aid stenddə ölkəmizin işğal olunmuş ərazilərində yaradılmış qondarma rejimi təbliğ edən əyani vasitələr və xəritələr yerləşdirməyə cəhd edib.
XİN-nin Mətbuat xidmətinin rəhbəri Hikmət Hacıyev 1news.az-a bildirib ki, Azərbaycanın Birləşmiş Ərəb Əmirliklərindəki(BƏƏ) səfirliyi və Dubaydakı Baş konsulluğu tərəfindən bu fakt müəyyən olunub və dərhal sərginin təşkilatçılarına və BƏƏ-nin rəsmi orqanlarına müraciət edilərək bu təxribatın qarşısı alınıb.
Nəticə etibarilə, qondarma rejimi təbliğ edən təxribatçı xarakterli əyani vasitələr Ermənistan stendindən yığışdırılıb.
Azərbaycanın BƏƏ-dəki səfirliyi və Dubaydakı Baş konsulluğu tərəfindən məsələ nəzarətdə saxlanılır.
Sərgidə Mədəniyyət və Turizm Nazirliyinin təşkilatçılığı ilə ölkəmiz böyük stendlə təmsil olunur. Azərbaycan pavilyonunda ölkəmizin çoxsaylı turizm şirkəti iştirak edir.
Pərvanə Sultanova
