Mikayıl Cabbarov: Heydər Əliyevin təhsil fəlsəfəsi bu gün də öz bəhrəsini verir
Heydər Əliyevin təhsil fəlsəfəsi bu gün də öz bəhrəsini verir və təhsilin bütün səviyyələrində uğurların əsasını təşkil edir.
1news.az-ın verdiyi xəbərə görə, bunu təhsil naziri Mikayıl Cabbarov ümummilli lider Heydər Əliyevin anadan olmasının 94-cü ildönümü münasibətilə təşkil olunmuş “Ən yaxşı təqdimat” müsabiqəsi qaliblərinin mükafatlandırılması mərasimi zamanı bildirib.
“Ölkə Prezidenti İlham Əliyevin rəhbərliyi ilə dövlətimiz bütün sahələrdə, o cümlədən təhsildə inkişaf və müasirləşmə proseslərini uğurla həyata keçirir. Son illərdə təhsil islahatlarının məzmunca daha praktik və səmərəli xarakter alıb. Bu, təhsilin keyfiyyətinin artırılmasının başlıca hədəfdir”.
Nazir 5 yaşlı uşaqların məktəbəhazırlığının ölkə üzrə 55 faiz təşkil etməsini, təhsilalanların qiymətləndirilməsinin beynəlxalq təcrübəyə uyğunlaşdırılmasını, müəllimlərin maddi motivasiyasının yaxşılaşdırılmasını, vətəndaş məmnuniyyətinin təmin edilməsini və ali təhsil müəssisələrinin yeni çağırışlara cavab verməsi yönündə görülən işləri təhsildə aparılan dəyişikliklər kimi diqqətə çatdırıb.
Ümumi təhsil məktəblərinin IX-XI sinif şagirdləri arasında keçirilən təqdimat müsabiqəsi Təhsil Nazirliyi, Heydər Əliyev Fondu, Yeni Azərbaycan Partiyası, Nəqliyyat, Rabitə və Yüksək Texnologiyalar Nazirliyi, Azərbaycan Təhsil İşçiləri Azad Həmkarlar İttifaqı Respublika Komitəsi tərəfindən təşkil olunub.
“Ən yaxşı təqdimat” müsabiqəsinin nəticələrinə əsasən, 6 nəfər I, 9 nəfər II, 15 nəfər III dərəcəli diplomla, 23 nəfər isə tərifnamə ilə təltif olunub.
Müsabiqə qaliblərinə mükafat və müxtəlif qiymətli hədiyyələr təqdim edilib.
S.Xankişiyeva
