AMEA-nın Yüksək Texnologiyalar Parkı “EPC Group” MMC ilə əməkdaşlıq edəcək - FOTO
Avqustun 30-da Azərbaycan Milli Elmlər Akademiyasının (AMEA) Yüksək Texnologiyalar Parkı (YTP) ilə “EPC Group” MMC arasında əməkdaşlığa dair müqavilə imzalanıb.
Bu barədə 1news.az-a Yüksək Texnologiyalar Parkından məlumat verilib.
İmzalanma mərasimində AMEA-nın prezidenti, akademik Akif Əlizadə əməkdaşlıq perspektivlərindən söz açaraq bildirib ki, əsas məqsəd elm və biznesin vəhdətinin təşkilidir. A.Əlizadə bildirib ki, elm və istehsalatın inteqrasiyasını təmin etmək Azərbaycan elmi üçün əhəmiyyətli yenilikdir. Bu istiqamətdə əldə olunan nəticələr AMEA-nın elmi-ictimai həyatında mühüm nailiyyətlərin qazanılmasına təkan verəcək.
“EPC Group”un direktoru Məhəmməd Miyabi rəhbərlik etdiyi şirkətin elmi tədqiqatlar və ixtiraların kommersiyalaşdırılması məqsədilə AMEA YTP ilə əməkdaşlıqda maraqlı olduğunu bildirib. Qeyd edib ki, əsasən mühəndislik üzrə ixtisaslaşan “EPC Group” böyük biznes komandasına və investisiya sahəsində geniş beynəlxalq təcrübəyə malikdir. Müxtəlif ixtiraların, elmi tədqiqatların nəticələrinin tətbiqini həyata keçirən “EPC Group” texnologiyaların inkişafının uğurlu nəticələrini mövcud beynəlxalq şəbəkə imkanlarından istifadə etməklə kommersiyalaşdırmağı qarşısına məqsəd qoyub.
Daha sonra Reza Vaziri çıxış edərək təmsil etdiyi qurumun AMEA ilə əməkdaşlığının təməlinin qoyulduğunu deyib, bu əlaqələrin bütövlükdə Azərbaycan elminin yüksəlişində mühüm rol oynayacağına əminliyini bildirib.
AMEA YTP-nin direktoru, aqrar elmlər üzrə fəlsəfə doktoru Vüqar Babayev cari ilin fevral ayında iki qurum arasında imzalanmış əməkdaşlıq sazişini xatırladaraq bildirib ki, 6 ay ərzində mütəmadi görüşlər keçirilib, birgə layihələrin təşkili ilə bağlı geniş müzakirələr aparılıb. Azərbaycanda elm potensialından istifadə etməklə innovativ layihələrin istehsalata ötürülməsinin vacibliyini vurğulayan YTP-nin direktoru qeyd edib ki, bu gün imzalanacaq müqavilə ölkədə elmlə biznesin inteqrasiyasına dair ilk sənəd olacaq. Elmi tədqiqatların aparılmasında sahibkarlığın xüsusi rolunu qeyd edən V.Babayev müqavilədə biotexnologiya mərkəzinin yaradılması, elmi işlərə dəstəyin göstərilməsi kimi bir çox məsələlərin öz əksini tapdığını bildirib.
V.Babayev elmi ixtiraların kommersiyalaşdırılması nəticəsində əldə olunan məhsulların yalnız daxili bazar üçün deyil, eyni zamanda, xarici bazar üçün nəzərdə tutulduğunu diqqətə çatdırıb.
AMEA-nın akademik-katibi, akademik Rasim Əliquliyev Azərbaycan Prezidentinin Sərəncamı ilə yaradılan Yüksək Texnologiyalar Parkının fəaliyyətini yüksək qiymətləndirib. Bir il ərzində YTP-nin ölkədə böyük nüfuz qazandığını və bir çox nailiyyətlərə imza atdığını diqqətə çatdırıb. Bu qurumun biznes təfəkkürü və innovativ düşüncənin inkişafına təkan verdiyini, müvafiq sahələrdə əməkdaşlıq imkanlarını genişləndirdiyini vurğulayıb. Fundamental tədqiqatların aparılmasının AMEA-nın prioritetlərindən olduğunu söyləyən alim artıq bu qurumda elm və kommersiyanın inteqrasiyası, biliklər iqtisadiyyatının formalaşması ilə bağlı kompleks tədbirlərin görüldüyünü qeyd edib.
Sonda iki qurum arasında əməkdaşlığa dair müqavilə imzalanıb. Sənədi YTP-nin direktoru V.Babayev və “EPC Group” MMC-nin rəhbəri M.Miyabi imzalayıblar.
Müqavilədə “EPC Group”un fəaliyyəti üçün YTP-yə aid sənaye sahəsində lazımi şəraitin təmin olunması nəzərdə tutulub. Əməkdaşlıq çərçivəsində innovativ layihələrin həyata keçirilməsi üçün laboratoriyaların müasir texniki avadanlıqlarla təchiz olunması, pilot qurğuların yaradılması məqsədilə lazım olan ərazinin təşkili və işçi qrupunun formalaşması məsələləri nəzərdə tutulub.
1news.az
