Bu gün Qurban bayramıdır
Bu gün bütün müsəlman aləmi müqəddəs Qurban bayramını qeyd edir.
Bu bayram özündə İslamın yüksək mənəvi keyfiyyətlərini - mərhəməti, yaxşılığı və insanlara qarşı sevgini təcəssüm edir.
Bu bayram İslamın, cəmiyyətdə birliyin güclənməsinə, insanların xeyir əməllərə yönəlməsinə qulluq edən yüksək ümumbəşəri dəyərlərə sadiq olduğunun bariz nümunəsidir.
Qeyd edək ki, dini qurban kəsmə İbrahim peyğəmbərin adı ilə bağlı olan bir mərasimdir. Əhvalata görə, yuxuda Allah İbrahim peyğəmbərə oğlu İsmayılı qurban verməyi (onların Allaha imanını yoxlamaq üçün) əmr edir. İbrahim əsl dindar kimi Allahın əmrini yerinə yetirməyə hazırlaşır, İsmayıl özü də qurban olmağa razılaşır.
Allaha qəlbən yaxın və sadiq olduğunu sübut etmək istəyən İbrahim peyğəmbər oğlu İsmayılı qurban kəsməyə hazırlaşır. Lakin Allah bunu öz elçisinə rəva bilməyərək ona bir qoç göndərir. Buna görə də Qurbanlıq bayramında kəsilən qurbana “İsmayıl qurbanı” da deyirlər.
Qurban bayramı Ramazan ayının qurtarmasından 70 gün sonra - Zilhiccə ayının 10-da qeyd edilir və adətən 3-4 gün davam edir.
Dini qurban kəsmə mərasimi İslamdan da əvvəl mövcud olub, lakin o vaxtlar günahdan təmizlənmək, qəzəblənmiş Allahın könlünü almaq və s. nəzərdə tutulub. Hicrinin (Məhəmməd peyğəmbərin Məkkədən Mədinəyə köçməsinin) ikinci ilindən sonra dini qurban kəsmənin İslam aləmində başqa məqsədləri və səbəbləri yaranıb. Belə ki, dini qurban kəsmə islam aləmində böyük ruh yüksəkliyi, dindarlıq, xeyriyyəçilik, başqalarına kömək etmək kimi əlamətlərə yiyələnib.
Qurban bayramda hər bir imkanlı müsəlman qoyun, qoç, inək, dana və ya dəvə kəsib kəsib, onun ətini imkansızlara, kasıblara paylamalıdır.
Bu müqəddəs bayram münasibətilə digər müsəlman ölkələrində olduğu kimi bu gün paytaxt Bakıda və Azərbaycanın bütün bölgələrində qurbanlar kəsilir.
İslam dünyasının ən müqəddəs bayramlarından sayılan Qurban bayramı bütün müsəlman ölkələrində təmtəraqla qeyd olunur. Azərbaycan müstəqillik əldə etdikdən sonra Milli Məclisin qəbul etdiyi 1992-ci il 27 oktyabr tarixli “Azərbaycan Respublikasının bayramları haqqında” qanuna əsasən, Qurban bayramı Azərbaycanda da dövlət səviyyəsində bayram edilir.
Nazirlər Kabinetinin qərarına əsasən, Qurban bayramı ilə əlaqədar Azərbaycanda senytabrın 1-i və 2-si qeyri-iş günüdür.
Əmək Məcəlləsinə əsasən, sentyabrın 2-si şənbə gününə təsadüf etdiyi üçün sentyabrın 4-ü də qeyri-iş günü sayılır. Beləliklə, ölkədə ardıcıl 4 gün iş olmayacaq.
1news kollektivi olaraq Azərbaycan müsəlmanlarını bu müqəddəs bayram münasibəti ilə təbrik edirik. Bayramınız mübarək!
Babək Cahandarov
