IV sinif şagirdi: Mehriban xanım məni anam kimi qucaqladı... – FOTO

Redaksiyamıza Rauf Abbasov adlı şagirddən məktub gəlib.

Rauf bu gün yeni binasının açılışı olan 20 nömrəli məktəb-liseyin 4-cü sinif şagirdidir.  Açılış mərasimində Azərbaycan Respublikasının Prezidenti İlham Əliyev və birinci xanım Mehriban Əliyeva iştirak ediblər.

Balaca Raufun məktubunu diqqətinizə çatdırırıq:

“Salam. Mən sizə özüm məktub yazmaq istəyirdim. Lakin səhvlərə yol verərəm deyə atamdan xahiş etdim. Mənim səhvə yol verməyim bağışlanmazdır. Çünki əlaçıyam. Yazdığım məktubu isə çoxları oxuyacaq.

Mən Rauf Abbasov bu gün yeni binasının açılışı olan 20 nömrəli məktəb-liseyin 4-cü sinif şagirdiyəm. Açılış mərasiminə Prezidentimiz və Mehriban xanım gəlmişdi. Bilirsiniz, əvvəllər onları yalnız televizorda görmüşdüm. İndi isə onlarla yanaşı dayanmışdım. Prezident bizlərə uğurlar diləyərək yaxşı oxumağı tövsiyə etdi.  

Məktəbimiz dünyada ən böyük məktəbdir. Düşünürdüm ki, burada itərəm. Çoxlu kameralar vardı. Bizim fotolarımızı çəkdilər. Mehriban xanım məni bağrına basdı, onun əlləri anamınkı tək isti idi. Sonda isə o, dedi:

“Bu gün axşam xəbərlərdə sizi göstərəcəklər”.

Axşamı gözləyəcəyəm ki, xəbərlərə baxım və hər kəsə olanları deyim. Və bir də. Prezidentimiz hündürboyludur. Mən də hündürboy olmaq istəyirəm. Çünki  hündürboy adamlar hər şeyi görür və bilir.

Hər kəsi salamlayıram və çoxlu-çoxlu əla qiymətlər arzulayıram. Çox sözlər söyləmək istərdim, amma ən yaxşısı xəbərləri gözləyim”.

1news.az redaksiyası balaca Raufu, eləcə də bütün şagirdləri yeni tədris ili münasibətilə təbrik edir və onlara uğurlar diləyir!

S.Xankişiyeva