Bakıda Meksikanın milli bayramı qeyd edilib

Bakıda Meksikanın Müstəqillik Günü ilə bağlı qəbul keçirilib.  

1news.az  xəbər verir ki, Meksikanın fövqəladə və səlahiyyətli səfiri Rodriqo Labardini çıxışında bildirib ki, iki ildən artıqdır Azərbaycandadır və burada ancaq mehribanlıq, qonaqpərvərlik görüb.

O vurğulayıb ki, iki ölkə arasında münasibətlər gündən-günə genişlənir:

“Neft və qaz ölkələrimiz arasında təbii bağlılıqdır. Meksikadan gələn neft mütəxəssisləri və rəsmiləri buradakı neft sahəsinin ali təhsil ocaqlarında olublar. Bu da ikitərəfli əməkdaşlıq əzmini nümayiş etdirir".

Diplomat əlavə edib ki, Meksika və Azərbaycan bu gün dünyanın fərqli yerlərində logistika mərkəzlərinə çevrilməkdədir. İkitərəfli əməkdaşlıqdan söz açan səfir Labardini deyib ki, səfirlik açılanda ticarət əlaqələri iki milyon dollar idi. Bu gün isə həmin rəqəm 22 milyon dollar qalxıb.

O, ölkələrimiz arasında turizm sahəsinin də inkişaf etdirdiyini  bildirdi.  Əlavə edib ki, turizm bu gün Meksika ÜDM-nin 9 faizini təşkil etməkdədir.

Daha sonra çıxış edən Xarici İşlər Nazirliyinin şöbə müdiri Anar Canəhmədov bildirib ki, iki ölkə arasında münasibətlər müxtəlif sahələrdə inkişaf edib və qarşılıqlı səfərlərlə daha da gücləndirilib. Onun sözlərinə görə, hər iki ölkədə qarşılıqlı olaraq səfirliklər açıldıqdan sonra  müxtəlif sahələrdə təmaslar genişləndirilib, sazişlər imzalanıb. XİN rəsmisi Dağlıq Qarabağ münaqişəsi və Meksikanın bu məsələdə mövqeyinə də toxunub:

"20 ildir Ermənistanın işğalçılıq siyasəti regional sabitliyə təhlükə yaradır. Biz işğala son qoyulmasını tələb edən BMT qətnamələrinin yerinə yetirilməsinin regional təhlükəsizliyə və sosial rifaha töhfə verəcəyinə əminik. Meksika Senatı və deputatlar Palatasının 2011-ci ildə Xocalı faciəsi ilə bağlı qəbul etdiyi qətnaməni yüksək qiymətləndiririk".

P.Sultanova