Mübariz Əhmədoğlu: Sərkisyanın BMT BA-da erməni dilində çıxışı yalnız diaspordan şəxsi maraqları üçün pul qoparmağa xidmət edir
Ermənistan prezidenti S.Sərkisyan BMT Baş Assambleyasında erməni dilində çıxış etdi. BMT-nin rəsmi 6 dilindən biri olan rus dilini sınıq-salxaq bildiyi halda da çıxışını rus dilində etmədi. Ermənistan prezidentinin çıxışının mətninin rus və ya ingilis dilinə tərcümə olunması da bəlli deyil.
1news.az xəbər verir ki, bunu Siyasi İnnovasiya və Texnologiyalar Mərkəzinin sədri, politoloq Mübariz Əhmədoğlu bildirib. O qeyd edib ki, çıxışın mətni ilə tərcümənin fərqli olması ehtimallıdır:
“Ona görə S.Sərkisyanın BMT Baş Assambleyasındakı çıxışı Ermənistanın daxilinə və diaspor ermənilərinə hesablanmış addım idi: S.Sərkisyan hakimiyyətdən gedir, ona öz cibini doldurmaq lazımdır. Dünya Bankı, Beynəlxalq Valyuta fondu və digər strukturlar yeni kreditlər vermir. Yeni kreditlər verilsəydi, S.Sərkisyan əvvəlki qaydada korrupsiya vasitəsilə kreditlərdən müəyyən qədər vəsait cibinə qoya bilərdi. Ona görə diasporu çağırdı və guya yeni Ermənistan qurur, Ermənistan güclənir, Ermənistanın prezidenti BMT BA-nın tribunasından çıxış edir və bu adla da diasporda bir-iki emosional şəxsdən müəyyən qədər yəqin ki, pul götürəcək”.
Ermənistanın getdikcə zəiflədiyini deyən politoloq bildirib ki, bu zəifləmədə erməni elitasının qeyri-adekvat davranışı təsirli rol oynayır:
“Ermənistanın zəifləməsinin ən bariz nümunələrindən biri bu günlərdə Ermənistanın müstəqilliyinin qeyd olunması ətrafında baş verənlərdir; Əhalinin Ermənistanın müstəqilliyinə marağı azalıb. Əvvəllər də əhali yoxsul idi, amma gələcək perspektivə inandığı üçün müstəqilliklə bağlı tədbirlərdə iştirak edirdi. İndi artıq gələcəyə inamı qalmayıb.
Ermənistanın müstəqilliyinin beynəlxalq aləmdə də dəyəri yoxdur. Beynəlxalq aləmdən Ermənistanın müstəqilliyi ilə bağlı gələn reaksiyalar əvvəlki illə müqayisədə qat-qat zəif idi. S.Sərkisyanın 9 illik prezidentliyinin nəticəsi budur. S.Sərkisyan erməni xalqının arzuladığı prezident olmadı. Erməni xalqı çoxdan S.Sərkisyandan məyus olub. 2008-ci ilin mart qırğınları S.Sərkisyanın seçki yolu ilə hakimiyyətə gəlmədiyini göstərdi”.
“R. Köçəryan hakimiyyəti S.Sərkisyana verməsinin səbəbini öz dili ilə izah etdi; Mən ailəmi yalnız S.Sərkisyana etibar edə bilərəm. R.Köçəryanın dediyindən başa düşülür ki, S.Sərkisyan R.Köçəryanın ailəsinin mühafizəçisi imiş. Orta əsrlərdə Ermənistanın da daxil olduğu Azərbaycan coğrafiyasında xanların hakimiyyətini mehtərlərə ötürməsi halları da olub.
Ermənistan özü böyük qüsurlardan ibarət olduğu halda erməni siyasilərinin Azərbaycanda nöqsan axtarması elementar əxlaq və məntiqdən uzaqdır”.
1news.az
