Bakıda Birləşmiş Ərəb Əmirliklərinin milli bayramı qeyd edilib
Birləşmiş Ərəb Əmirliklərinin (BƏƏ) Milli Günü münasibətilə Bakıda rəsmi qəbul təşkil edilib.
1news.az xəbər verir ki, qəbulda hökumət rəsmiləri, millət vəkilləri, səfirlər, ictimaiyyət nümayəndələri iştirak ediblər.
İki ölkənin dövlət himnləri səsləndirildikdən sonra çıxış edən BƏƏ-nin ölkəmizdəki səfiri Mohamed Hamel Alqubaisi ölkəsinin yaranma tarixindən söz açıb.
Səfir deyib ki, ölkəsində baş verən son kabinet dəyişikliyi gənclərə, elm və millətin proqressiv gələcəyinə verilən dəyərin nümunəsidir. "Son on il ərzində elan edilmiş və həyata keçirilmiş müxtəlif plan və strategiyalar öz bəhrəsini verir. BƏƏ çox yüksək insan inkişafı, təhlükəsiz və sabitlik üzrə ən yaxşı ölkələr sırasına daxildir" deyən səfir əlavə edib ki, ölkəsi həm də dünyanın müxtəlif bölgələrinə və xalqlarına humanitar yardım edir.
"BƏƏ ilə Azərbaycan arasında dərin tarixi olan dostluq əlaqələri mövcuddur. Səfir vurğulayıb ki, son 10 ay ərzində BƏƏ-dən Azərbaycana 100 min turist gəlib: "BƏƏ-nin Azərbaycandakı səfirliyi BƏƏ-Azərbaycan Ticarət Məclisi yaradıb. Bu il ərzində ölkələrimiz arasında ticarət indeksinin artmasına maraq göstərən təxminən 40 ticarət tərəfdaşı və şirkətin iştirakı ilə iki iclas keçirdik. Bu məclis iki ölkədəki istehsalçılara qarşılıqlı distribyutorlarnı tapmağa imkan verir".
Xarici işlər nazirinin müavini Mahmud Məmməd-Quliyev Azərbaycan dövləti və xalqı adından BƏƏ dövləti və xalqını təbrik edib. O bildirib ki, BƏƏ Azərbaycanın müstəqilliyini tanıyan ilk müsəlman ölkələrindən biridir: "Hazırda əməkdaşlığımız davam edir və günü gündən möhkəmlənir. BƏƏ Dağlıq Qarabağ münaqişəsində Azərbaycanın ədalətli mövqeyini dəstəkləyir".
Nazir müavini vurğulayıb ki, Azərbaycan qarşı tərəflə ticarət əlaqələrinin daha da inkişafında maraqlıdır.
M.Məmməd-Quliyev turizm sahəsində əlaqələrin inkişaf etdiyini, viza rejiminin sadələşdirildiyini söyləyib.
Pərvanə Sultanova
