Mübariz Əhmədoğlu: Sarkisyan Makronu yalanlarına tabe edə bildi
Ermənistan prezidenti S.Sərkisyanın Fransaya səfəri və Fransa prezidenti E.Makronla görüşü bir sıra prizmalardan diqqəti cəlb edir.
Ermənistan prezidenti MDB məkanından yeni seçilmiş prezident E.Makronla görüşmüş ilk prezidentdir. E.Makronun beynəlxalq proseslərdə aktivliyini nəzərə alsaq onun S.Sərkisyanı qəbul etməyə vaxt ayırması daha çox diqqət çəkən məsələdir. Çünki S.Sərkisyanın prezidentliyi dövründə:
ı. Ermənistanla Fransanın arasında mal dövriyyəsi azalıb, tarixi minimaldadır.
ıı. Fransa şirkətləri Ermənistanda ciddi itkilərə məruz qalıblar. Bəzi şirkətlər hətta tikdiyi müəssisələri erməni biznesmenlərinə zorən təhvil verərək ölkəni tərk ediblər. “Karfur” şirkətinin başına gətirilənlərdən hamı xəbərdardır.
ııı. Ermənistanda fransız dilinin vəziyyəti hətta SSRİ dövrünə nisbətən daha pisləşdiyini, gerilədiyini Fransanın Ermənistandakı keçmiş səfiri Jan-Fransua Şarpantye təsdiqlədi.
Bütün bu məsələlərin fonunda S.Sərkisyanın Ermənistanı və Fransanı eyni dəyərlər sistemində adlandırması və Fransanın Ermənistanda Frankofoniya sammitinin təşkilinə razılığın verməsi çox maraq doğuran məsələdir. Makron Ermənistanın Fransa ilə münasibətlərinə dair bircə dənə də olsun müsbət fakt deyə bilməz.
Makronla görüşdə S.Sərkisyanın əsas məqsədi yenidən özünü legitimləşdirməkdir. 2008-ci ildə prezident seçilən S.Sərkisyan az keçmiş 1 mart qırğınlarının əsas iştirakçılarından biri oldu. 1 mart qırğınları S.Sərkisyanın prezidentliyinin legitimliyini kifayət qədər ciddi şübhə altına qoydu. O zaman Ermənistanın Fransada səfiri işləyən indiki Xİ naziri E.Nalbandyan məhz Fransa rəhbərliyini dilə tutaraq, ilk olaraq Fransa prezidenti N.Sarkozinin təbrikini ala bildi və məhz bundan sonra Qərb istiqamətdən S.Sərkisyanın prezidentliyinə təbriklər daxil olmağa başladı. E.Nalbandyan Xİ naziri təyin edildi.
İndi S.Sərkisyan təzədən qeyri-qanuni yolla Ermənistanda birinci şəxs olmaq niyyətindədir. Prezident S.Sərkisyanın bəlli bəyanatları heç kəsin yadından çıxmayıb. O bir neçə dəfə bildirdi ki, heç bir statusla - istər parlamentin spikeri, istər baş nazir, istər başqa postda Ermənistanın birinci şəxsi olmayacaq. Amma indi atdığı addımları göstərir ki, o Ermənistanda nəinki baş nazir postunda birinci şəxs olacaq, həm də Ermənistanın prezidentini də təyin edən baş nazir olacaq. Belə vəziyyətdə onun legitimliyi kifayət qədər ciddi şübhə yarada bilər. Ermənistanda müəyyən qüvvələr ən azı mətbuat səviyyəsində ajiotaj yarada biləcəklər. Məhz bu prizmadan Fransaya səfər Serj Sərkisyan üçün vacib idi. Ehtimal ki, o, öz istədiyini ala bildi.
Mübariz Əhmədoğlu,
Siyasi İnnovasiya və Texnologiyalar Mərkəzinin sədri
