“Aprel zəfərindən ötən hər gün üçün bir ağac əkək” devizi altında ağacəkmə kampaniyası keçiriləcək
Aprelin 4-də Təhsil və Müdafiə nazirlikləri 2016-cı ilin aprel ayında Azərbaycan ordusunun qazandığı tarixi qələbəyə həsr olunmuş “Aprel zəfərindən ötən hər gün üçün bir ağac əkək” devizi altında ağacəkmə kampaniyası keçirəcək.
1news.az-ın məlumatına görə, Pirəkəşkül qəsəbəsində yerləşən “N” saylı hərbi hissədə keçiriləcək ağacəkmə kampaniyasında Təhsil və Müdafiə nazirliklərinin rəhbər işçiləri, aprel döyüşləri şəhidlərinin və iştirakçılarının ailə üzvləri, şagirdlər, tələbə-könüllülər və KİV nümayəndələri iştirak edəcəklər.
Tədbirin keçirilməsində məqsəd Azərbaycanın hərb tarixinin zəfər səhifəsi olan aprel döyüşlərinin ikinci ildönümünün qeyd edilməsi, yeniyetmə və gənclərdə vətənpərvərlik ruhunun artırılmasına töhfə verilməsidir.
1news.az
