Akif Əlizadə yenidən AMEA prezidenti seçilib

Azərbaycan Milli Elmlər Akademiyasının (AMEA) prezidenti vəzifəsinə seçki keçirilib.

1news.az-ın məlumatına görə, AMEA-nın bu gün keçirilən illik ümumi yığıncağında akademiyanın hazırkı prezidenti Akif Əlizadənin adının gizli səsvermə bülleteninə daxil edilməsi barədə qərar qəbul edilib.

Səsvermədə 66 nəfər iştirak edib, onların hamısı A. Əlizadəyə səs verib.

A.Əlizadə seçkidən sonra çıxış edərək, bundan sonra da var gücü ilə çalışacağını deyib: “Prezident İlham Əliyev qarşımıza vəzifələr qoyub. Azərbaycan elmi irəlidə olmalıdır. Qarşıya qoyulan vəzifələrin icrası bizim elmimizin əsas inkişaf yoludur. İslahatları bir qədər də dərinləşdirək, intibah yolunu genişləndirək. Çünki qarşıda duran ən böyük məsələ budur”.

Xatırladaq ki, A.Əlizadə ilk dəfə AMEA prezidenti vəzifəsində 2013-cü ildə Mahmud Kərimovun vəfatından sonra seçilib. Buna qədər isə o, akademiyanın vitse-prezidenti olub.

1news.az