Nazir: Şagirdlərin dərs yükünün azaldılması üçün ciddi addımlar atılacaq

Şagirdlərin dərs yükü bizi hər zaman narahat edir. Buna görə də bu il məktəbdaxili qiymətləndirmənin dəyişdrilməsi ilə bağlı kifayət qədər iş aparılıb.

1news.az xəbər verir ki,  bunu təhsil naziri Ceyhun Bayramov Bakı şəhəri təhsil işçilərinin sentyabr konfransında çıxışı zamanı deyib.

Nazirin sözlərinə görə, şagirdlərin dərs yükünün yüngülləşdirilməsini nəzərdə tutan yeni məktəbədaxili qiymətləndirmə layihə Təhsil Nazirliyinin sabah keçiriləcək kollegiyasında geniş müzakirə ediləcək. Həmin sənəd əsasında xüsusilə ibtidai sinif şagirdlərinin dərs yükünün azaldılması üçün ciddi addımlar atılacaq.

C.Bayramov qeyd edib ki, son 5 il ərzində təhsildə keyfiyyətin yüksəlməsi istiqamətində müsbət dinamika olub:

“Gələn il məktəbəqədər təhsillə əhatəolma səviyyəsinin yüksəldilməsi və bunun bütün ölkə üzrə əhatə olunmasına çalışılacaq”.

Təhsil naziri onu da qeyd edib ki, məktəbə vaxtında getmək göstəricisi təhsilin əsas göstəricilərindəndir. Məktəbə məktəb yaşından gec getmək üzrə 2012-ci ildə olan 12 faizlik göstərici 2 dəfə azalaraq hazırda 6 faiz təşkil edir.

C.Bayramov növbəti tədris ilində bunu aşağı salmağın əsas hədəflərdən olduğunu da söyləyib.

Nazir əlavə edib ki, müəllim nüfuzunun artması da əsas hədəflərdəndir.

C.Bayramov bildirib ki , bu il qəbul imtahanlarında 500 baldan yuxarı toplayaran 2091 nəfər abituriyent müəllimlik ixtisasını elektron ərizəsində birinci qeyd edib. Bu, ötən tədris ili ilə müqayisədə 53,6 faiz çoxdur.

Nazir respublika üzrə bilik yarışlarında, beynəlxalq olimpiadalarda və ali məktəblərə qəbul imtahanlarında uğur qazanan şagirdlərin sayının ilbəil artdığını bildirib.

Babək Cahandarov