Cəmiyyət və küçə uşaqları –“Çıxışa doğru”da MÜZAKİRƏ – FOTO – VİDEO
Hər bir cəmiyyəti narahat edən küçə uşaqları problemi, onların bu həyata məruz qalmasının səbəbi və həmin uşaqlarla sosial işin təşkili ölkəmiz üçün də aktual məsələlərdəndir.
Mütəxəssislərin fikrincə sosial – iqtisadi amillərdən olan yoxsulluq və işsizlik, valideynlərin xəstə və iş qabiliyyətində olmaması, küçə həyatının cazibəli görünməsi, əyalətlərdən böyük şəhərlərə miqrasiya, urbanizasiya, fövqəladə hadisələr, ailədaxili problemlər, qeyri-rəsmi nigahlar, ailədəki ağır iş tələblərindən qurtulmaq cəhdi, valideynlərin alkoqol və narkotika aludəçisi olması, uşaq mərkəzlərində yaşayan uşaqların müəssisədən qaçmaq istəyi və digər faktorlar uşaqların küçə həyatına məruz qalmasının əsas səbəbləridir.
Qeyd etmək lazımdır ki, mənfur qonşumuz Ermənistanın ölkəmizə təcavüzü nəticəsində yüzlərlə azərbaycanlı övladı valideyn himayəsindən məhrum olub, internatlarda məskunlaşıb, küçələrə düşüb. Uşaqların valideynlərini itirməsi, qaçqın və məcburi köçkün ailələrinin sosial vəziyyəti küçə həyatına məruz qalmış uşaqların sayının artmasına təsir göstərib.
1news.az-ın verdiyi xəbərə görə, AzTV-nin “Çıxışa doğru” verilişində “Cəmiyyət və küçə uşaqları” mövzusunda aparılan müzakirələr zamanı bu barədə ətraflı danışılıb. Verilişin qonaqları – Ailə, Qadın, Uşaq Problemləri üzrə Dövlət Komitəsinin uşaq problemləri şöbəsinin müdiri Cəmilə Bağırova, Azərbaycan Uşaqlar Birliyinin sədri Kəmalə Ağazadə, ailə və uşaq psixoloqu Ramidə Məmmədova və Xətai rayon İcra Hakimiyyətinin Qəyyumluq və Himayəçilik komissiyasının üzvü Yusif Babayev mövzu ətrafında müzakirə aparıblar.
“Çıxışa doğru” verilişini bütöv şəkildə Azərbaycan Televiziyasının “YouTube” kanalından izləyə bilərsiniz: