Fəvvarələr Meydanında unikal dizayna malik yenilənmiş “McDonald’s” restoranının açılışı olub - FOTO

Bakının mərkəzində, Fəvvarələr Meydanında yerləşən Azərbaycanın ilk “McDonald’s” restoranı yenidən qapılarını qonaqların üzünə açıb.

1999-cu ildə açılmış Azərbaycanın ilk “McDonald’s” restoranı dərhal paytaxt sakinlərinin və qonaqlarının sevimli istirahət məkanına çevrilib. Yenidənqurma ilə əlaqəli qısamüddətli fasilədən sonra bu gün restoran yenidən qonaqlarını salamlayıb.

Artıq restoranda vaxt keçirmək daha komfortlu olub. Restoranda qonaqpərvərlik üzrə ekspertlər və 100-dən artıq əməkdaş çalışır. Restorandakı əsas yeniliklərdən biri “masa arxasında xidmət”dir. Belə ki, artıq qonaqlar özünəxidmət köşkündə və ya kassada yeməyi sifariş verdikdən sonra masa arxasına keçərək sifarişini gözləyir.

Yenilənmiş restoranın unikal dizaynı da qonaqların sevincinə səbəb olub. İnteryerin tərtibatında ağac, daş və şüşədən hazırlanmış elementlərdən istifadə edilib. Şirkət nümayəndəsinin sözlərinə görə, restoranın yeni konsepsiyası daha əlverişli və rahat atmosferin yaradılmasına yönəlib. Bu isə qonaqlarımıza dadlı yeməklərdən, sürətli xidmətdən və ünsiyyətdən zövq almaq imkanı yaradır.

“Azərbaycanda fəaliyyətə başlamış ilk “McDonald’s” restoranının qapılarını yenidən qonaqların üzünə açmağa şadıq. Son 23 ildə Bakı üçün xüsusi bir yer olan Fəvvarələr Meydanında yerləşən bu restoranla bağlı çoxlarının xoş xatirələri var. Müasirləşdirilmiş restoran qida sənayesi sahəsində ən son texnoloji tələblərə cavab verən avadanlıqla təchiz edilir.

Qeyd etmək istərdim ki, mövcud restoranların müasirləşdirilməsi və yenilərinin açılmasına investisiya yatırmaqla şirkət həmçinin yerli istehsalın artırılmasına öz dəstəyini verir ki, bununla da Azərbaycanda qeyri-neft sektorunun inkişafına öz töhfəsini verir”, - şirkət nümayəndəsi deyib.