Azərbaycan, Aİ və Ermənistan liderlərinin Brüsseldə üçtərəfli görüşü keçiriləcək

Azərbaycan Prezidenti İlham Əliyev, Avropa İttifaqı (Aİ) Şurası Prezidenti Şarl Mişel və Ermənistan Baş naziri Nikol Paşinyan arasında üçtərəfli görüş keçirəcək.

1news.az-ın Trend-ə istinadla verdiyi xəbərə görə, bu barədə məlumat Aİ-nin rəsmi saytında yerləşdirilib.

Qeyd olunur ki, Avropa İttifaqı bu gün Brüsseldə Ermənistan və Azərbaycanın yüksək səviyyəli rəsmilərinin iki ölkə arasında bir sıra məsələlərin həlli yollarını tapmaq üçün birgə səyləri inkişaf etdirmək üçün görüşünə ev sahibliyi edib.

Xüsusilə, Avropa İttifaqı Şurasının prezidenti Şarl Mişel, Azərbaycan Respublikasının Prezidenti İlham Əliyev və Ermənistan Respublikasının Baş naziri Nikol Paşinyan arasında 2022-ci il aprelin 6-da Brüsseldə keçiriləcək görüşə hazırlıqla bağlı müzakirələr aparılıb.

Bugünkü görüşdə Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev, Ermənistan Təhlükəsizlik Şurasının katibi Armen Qriqoryan və Avropa İttifaqının Cənubi Qafqaz üzrə xüsusi nümayəndəsi Toivo Klaar iştirak edib.

Hikmət Hacıyev və Armen Qriqoryan substantiv müzakirələr zamanı 14 dekabr 2021-ci ildə Brüsseldə keçirilən iki ölkənin liderlərinin görüşü zamanı əldə olunmuş anlaşmaların davamı olaraq Azərbaycanla Ermənistan arasında siyasi və təhlükəsizlik vəziyyəti kimi məsələlərin spektrini nəzərdən keçiriblər. Tərəflər liderlərin 14 dekabr 2021-ci il tarixli görüşündə qaldırılan məsələlərlə yanaşı, müzakirələri davam etdirmək üçün növbəti həftələrdə yenidən görüşmək barədə razılığa gəliblər. Növbəti görüşdə ölkələr arasında sülh sazişinin perspektivləri ilə bağlı məsələlər də müzakirə mövzusu olacaq.